థర్డ్‌ వేవ్‌ను ఎదుర్కొనేందుకు సిద్ధంకండి: సుప్రీం కోర్టు

కరోనా థర్డ్​ వేవ్​కు సిద్ధంగా ఉండాలని.. ఆక్సిజన్​ వినియోగం, నిల్వలపై ఆడిట్​ జరపాలని సుప్రీంకోర్టు.. కేంద్రానికి సూచించింది. పాన్​ ఇండియా స్థాయిలో ఆక్సిజన్​ అందించాలని పేర్కొంది.

కరోనా మహమ్మారి మూడో దశకు దేశం సిద్ధపడి ఉండాలని, సరిపడా ఆక్సిజన్​ నిల్వలు ఉండేలా ప్రభుత్వాలు జాగ్రత్తలు తీసుకోవాలని సుప్రీంకోర్టు ఆదేశించింది. థర్డ్‌ వేవ్‌లో కరోనా వైరస్‌తో పోరాడటానికి పాన్ ఇండియా స్థాయిలో ఆక్సిజన్‌ అందించాలని.. ఆక్సిజన్‌ వినియోగం, నిల్వలపై ఆడిట్‌ జరపాలని కేంద్రానికి సూచించింది. రోజుకు 700 మెట్రిక్​ టన్నుల చొప్పున ప్రస్తుతం దిల్లీకి చేస్తున్న సరఫరాను తమ తదుపరి ఆదేశాలు జారీ చేసేవరకు తగ్గించవద్దని కేంద్రాన్ని ఆదేశించింది. పరస్పర ఆరోపణలకు అత్యున్నత న్యాయస్థానం వేదిక కాకూడదని స్పష్టం చేసింది. దిల్లీలో ఆక్సిజన్​ పంపిణీపై గురువారం జరిగిన విచారణలో ధర్మాసనం ఈ వ్యాఖ్యలు చేసింది.

ప్రజలు తమను అధికారం చేపట్టమని రెండు సార్లు అవకాశం ఇచ్చారని, కొవిడ్​ కారణంగా ప్రజలు పడుతున్న ఇబ్బందులను అర్థం చేసుకోగలమని కేంద్రం.. సుప్రీంకు సమాధానం ఇచ్చింది. సరిపడా ఆక్సిజన్​ అందుబాటులో ఉండేలా అత్యున్నత స్థాయిలో కృషి చేస్తున్నామని పేర్కొంది. ఆక్సిజన్​ పంపిణీపై కేంద్రం పక్షపాతంగా వ్యవహరిస్తోందన్న దిల్లీ ప్రభుత్వం ఆరోపణలను ఖండించింది.

కర్ణాటక హైకోర్టు తీర్పుపై కేంద్రం..

కర్ణాటకలో రోజూవారీ ఆక్సిజన్​ సరఫరా 965 మెట్రిక్​ టన్నుల నుంచి 1200 మెట్రిక్​ టన్నులు చేయాలన్న ఆ రాష్ట్ర హైకోర్టు ఆదేశాలపై కేంద్రం.. సుప్రీంకోర్టును ఆశ్రయించింది. ఈ ఆదేశాలపై స్టే విధించాలని విజ్ఞప్తి చేసింది. కేసును పరిశీలించి తదుపరి ఆదేశాలను జారీ చేస్తామని కోర్టు వెల్లడించింది.

కేంద్రం సుప్రీంను ఆశ్రయించడంపై కాంగ్రెస్​ తీవ్ర విమర్శలు చేసింది. కర్ణాటక హైకోర్టు ఆదేశాలపై కేంద్రం స్పందించిన తీరు తమను షాక్​కు గురి చేసిందని​ పేర్కొంది.

ఇదీ చదవండి :వైద్యం వికటించి ఎనిమిది మంది మృతి