ఒకప్పడు దేశాన్ని ఏలిన కాంగ్రెస్.. ఇప్పుడు అత్యంత గడ్డు కాలాన్ని ఎదుర్కోవడంపై కీలక వ్యాఖ్యలు చేశారు శివసేన నేత, ఎంపీ సంజయ్ రౌత్. గుజరాత్ స్థానిక ఎన్నికల్లో కాంగ్రెస్ పతనం ప్రజాస్వామ్యానికి హానికరమని.. పార్టీ అధిష్ఠానం దీనిని తీవ్రంగా పరిగణించి, సమాలోచన చేయాలని సూచించారు.
"ప్రతిపక్షం లేకపోతే దేశంలో ప్రజాస్వామ్యం ఉండదు. ప్రజాస్వామ్యం లేకపోతే ఈ దేశమే ఉండదు. అలా జరిగితే దేశీయ ఈస్ట్ ఇండియా కంపెనీ రాజ్యమేలుతుంది" అని రౌత్ వ్యాఖ్యానించారు.
కాంగ్రెస్ పార్టీ మెల్కోవాలి
కీలకమైన సూరత్లో కాంగ్రెస్ ఒక్క స్థానంలోనూ గెలవలేకపోవడం ఆశ్చర్యమన్నారు సంజయ్. మున్సిపల్ ఎన్నికల బరిలోకి దిగిన ఆమ్ఆద్మీపార్టీ(ఆప్) 27 స్థానాలను కైవసం చేసుకుని.. అక్కడ ప్రధాన ప్రతిపక్ష పార్టీగా నిలిచిందని గుర్తు చేశారు. ఆప్ విజయాన్ని స్వాగతిస్తున్నామన్న రౌత్.. పెద్ద పార్టీ అయిన కాంగ్రెస్ను గుజరాత్ సహా ఇతర రాష్ట్రాల్లో ప్రజలు ఎందుకు తిరస్కరిస్తున్నారో పార్టీ అధిష్ఠానం ఆలోచించాలని హితవు పలికారు.