కాంగ్రెస్ 85వ ప్లీనరీ సమావేశాలు ఛత్తీస్‌గఢ్‌ రాజధాని రాయ్పుర్లో శుక్రవారం ప్రారంభమయ్యాయి. ఈ సమావేశాలు మూడు రోజుల పాటు జరగనున్నాయి. మల్లిఖార్జున ఖర్గే.. ఏఐసీసీ అధ్యక్షుడిగా బాధ్యతలు చేపట్టిన తర్వాత తొలిసారిగా ఈ ప్లీనరీ సమావేశాలు జరుగుతున్నాయి. శుక్రవారం ఉదయం గంటలకు AICC స్టీరింగ్ కమిటీ సమావేశం ప్రారంభమైంది. అయితే ఈ సమావేశాలకు ఆ పార్టీ అగ్రనేతలు సోనియా గాంధీ, రాహుల్ గాంధీలు హాజరుకాలేదు.
ఈ సమావేశంలో 6 ప్రతిపాదనలపై చర్చలు జరగనున్నాయి. దీంతో పాటుగా పలు తీర్మానాలు రూపొందించనున్నారు. 2024 లోక్సభ ఎన్నికలకు స్పష్టమైన రోడ్మ్యాప్ను రూపొందించేలా పలు కీలక నిర్ణయాలు తీసుకోనున్నారు. ఈ ప్రతిపాదనలన్నీ ఫిబ్రవరి 26న జరిగే చివరి రోజున ఆమోదం పొందనున్నాయి. అనంతరం 26తేదీ సాయంత్రం బహిరంగ సభ ఏర్పాటు చేసి ప్లీనరీ సమావేశాలను ముగించనున్నారు.
ప్లీనరీ ఎజెండాను నిర్ణయించేందుకు స్టీరింగ్ కమిటీ కీలక నిర్ణయాలు తీసుకోనుంది. కాంగ్రెస్ వర్కింగ్ కమిటీకి ఎన్నికలు నిర్వహించాలా వద్దా అనేది కూడా ఈ సమావేశంలో నిర్ణయించనున్నారు. అయితే చాలా మంది పార్టీ నాయకులు ఎన్నికల నిర్వహణకు అనుకూలంగా లేరని.. దీనికి బదులుగా సీడబ్యూసీ సభ్యులను నామినేట్ చేసే హక్కును పార్టీ అధ్యక్షుడికి ఇవ్వాలని కోరుతున్నట్లు సమాచారం. కాంగ్రెస్ మాజీ అధ్యక్షుడు రాహుల్ గాంధీ మాత్రం ఎన్నికలు జరగాలని కోరుతున్నట్లు తెలుస్తుంది. ఎన్నికలు జరగకపోతే.. 25 మంది కాంగ్రెస్ వర్కింగ్ కమిటీ సభ్యుల్లో 23 మందిని కాంగ్రెస్ అధ్యక్షుడు నామినేట్ చేస్తారు. అయితే, సీడబ్యూసీకి ఎన్నికలు నిర్వహించేందుకు కమిటీ అనుకూలంగా నిర్ణయం తీసుకుంటే పార్టీ సిద్ధంగా ఉందని సీనీయర్ నేత జైరాం రమేశ్ తెలిపారు.
రాజకీయ, ఆర్ధిక, అంతర్జాతీయ వ్యవహారాలు, రైతులు-వ్యవసాయం, సామాజిక న్యాయం-సాధికారత, యువత-విద్య-నిరుద్యోగం వంటి పలు అంశాలపై ఈ ప్లీనరీలో తీర్మానాలు చేయనున్నారు. ఈ ఏడాది 9 రాష్ట్రాల్లో ఎన్నికలు, 2024 సాధారణ ఎన్నికల్లో గెలుపు లక్ష్యంగా విధాన నిర్ణయం, వ్యూహాలను ఈ సమావేశాల్లో ఖరారు చేయనున్నారు. దీంతో పాటుగా భాజపా విధానాలపై ప్లీనరీ వేదికగా కీలక ప్రకటన చేసే అవకాశం ఉంది.
