కాంగ్రెస్ కీలక నేత గులాం నబీ ఆజాద్ సోదరుడి కుమారుడు ముబాశిర్ ఆజాద్.. భాజపాలో చేరారు. జమ్ముకశ్మీర్ భాజపా అధ్యక్షుడు రవీందర్ రైనా, ఇతర సీనియర్ నాయకుల సమక్షంలో ముబాశిర్తో పాటు ఆయన మద్దతుదారులు కాషాయ కండువా కప్పుకున్నారు. ఈ సందర్భంగా మాట్లాడిన ఆయన.. 'క్షేత్రస్థాయిలో ప్రధాని నరేంద్ర మోదీ చేపట్టిన అభివృద్ధి కార్యకలాపాలు నన్ను ఎంతగానో ప్రభావితం చేశాయి. అందుకే భాజపాలో చేరాను' అని వెల్లడించారు.
ఆజాద్ తమ్ముడి కుమారుడైన ముబాశిర్.. 'కాంగ్రెస్ అదిష్ఠానం మా పెదనాన్నను అగౌరవపరిచింది. అది నన్ను బాధించింది. ఆ పార్టీ నుంచి విడిపోయేలా చేసింది' అని పేర్కొన్నారు. అయితే భాజపాలో చేరే విషయం గురించి గులాం నబీ ఆజాద్తో చర్చించలేదని తెలిపారు. కాంగ్రెస్ పార్టీ అంతర్గత పోరులో కూరుకుపోయిందని.. మోదీ నాయకత్వంలో ప్రజల సంక్షేమం కోసం పనులు జరుగుతున్నాయని అన్నారు.