'చరిత్రను కాలరాసి.. దేశ వారసత్వాన్ని చెరిపేందుకు కుట్ర'

congress foundation day: బలమైన భారత్‌ను అభివృద్ధి చేసేందుకు ఏళ్ల తరబడి పార్టీ నేతలు వేసిన దృఢమైన పునాదిని బలహీనపరిచేందుకు కొన్ని విద్వేషపూరిత సిద్ధాంతాలు ప్రయత్నిస్తున్నాయని కాంగ్రెస్ అధ్యక్షురాలు సోనియా గాంధీ ధ్వజమెత్తారు. కాంగ్రెస్​ పార్టీ 137వ వ్యవస్థాపక దినోత్సవం సందర్భంగా జెండా ఆవిష్కరణ అనంతరం.. భాజపాను పరోక్షంగా విమర్శించారు.

congress foundation day: బలమైన దేశాన్ని నిర్మించేందుకు కాంగ్రెస్‌ పార్టీ నేతలు ఏళ్ల తరబడి కష్టించి నిర్మించిన దృఢమైన పునాదులను బలహీనపరిచేందుకు విద్వేషం, పక్షపాతంతో కూడిన విభజన సిద్ధాంతాలు అన్ని ప్రయత్నాలు చేస్తున్నాయని పార్టీ అధినేత్రి సోనియా గాంధీ విమర్శించారు. కాంగ్రెస్‌ పార్టీ 137 వ్యవస్థాపక దినోత్సవంలో పాల్గొన్న సోనియా పతాకావిష్కరణ చేశారు. ఈ సందర్భంగా భాజపాపై పరోక్షంగా విమర్శలు గుప్పించారు.

దేశంలోని గంగాజమునా సంస్కృతిని చెరిపి వేయడం సహా చరిత్రను భాజపా నేతలు తప్పుగా చిత్రీకరిస్తున్నారని మండిపడ్డారు. ఈ చర్యలపై కాంగ్రెస్‌ పార్టీ మౌన ప్రేక్షకుడిలా చూస్తూ ఉండబోదని తెలిపారు. భారత్‌కు ఉన్న ఘనమైన వారసత్వాన్ని అస్థిరపరిచడాన్ని తాము అనుమతించబోమని సోనియా స్పష్టం చేశారు.

"స్వాతంత్య్ర ఉద్యమంలో ఏ రూపంలోనూ పాత్ర లేని విద్వేషం, పక్షపాతంతో కూడిన విభజన సిద్ధాంతాలు.. ఇప్పుడు మన సమాజంలోని లౌకిక వాతావరణానికి ఇబ్బంది కలిగిస్తున్నాయి. తమకు అర్హత లేకున్నా వారు చరిత్రను పునర్​ లిఖిస్తున్నారు. భయాన్ని సృష్టిస్తున్నారు. ద్వేషాన్ని వ్యాపింపజేస్తున్నారు. పార్లమెంటరీ ప్రజాస్వామ్యానికి ఉన్న గొప్ప సంప్రదాయాన్ని ఉద్దేశపూర్వకంగా ధ్వంసం చేస్తున్నారు. ఈ విధ్వంసక శక్తులపై భారత జాతీయ కాంగ్రెస్‌ తమ బలం, శ్రేణులతో పోరాటం చేస్తుంది."

- సోనియా గాంధీ, కాంగ్రెస్‌ అధ్యక్షురాలు

Congress Flag Sonia: దిల్లీలోని ఏఐసీసీ ప్రధాన కార్యాలయంలో పార్టీ జెండా ఆవిష్కరిస్తున్న సమయంలో జెండా ఊడి పడింది. తాడును కార్యాల‌య సిబ్బంది గట్టిగా లాగడం వల్ల జెండా ఊడి సోనియా గాంధీ చేతుల్లో పడింది. అయితే సమయస్ఫూర్తితో వ్యవహరించిన సోనియా జెండాను పైకెత్తి శ్రేణులకు చూపించి కార్యక్రమాన్ని పూర్తి చేశారు. ఈ కార్యక్రమంలో ముఖ్యనేతలు రాహుల్ గాంధీ, ప్రియాంక గాంధీ వాద్రా, మల్లిఖార్జున ఖర్గే సహా ఇతర నేతలు పాల్గొన్నారు.

ఇదీ చూడండి:'సాంకేతిక ప్రపంచానికి వెలకట్టలేని బహుమతులు ఇచ్చిన ఐఐటీ కాన్పుర్ '