అయోధ్య దీపోత్సవ ధగధగలకు గిన్నిస్​ అభినందనలు

ఉత్తర్​ప్రదేశ్​లోని ఆధ్యాత్మిక నగరి అయోధ్యలో కన్నుల పండువగా సాగిన దీపోత్సవాన్ని గిన్నిస్​ బుక్​ సభ్యులు అభినందించారు. ఆరు లక్షలకుపైగా మట్టి ప్రమిదల్లో వెలిగించిన దివ్వెలతో సరయూ నదీ తీరం దేదీప్యమానంగా వర్ధిల్లేలా చేసిన లోహియా విశ్వవిద్యాలయం సహా.. ఆ రాష్ట్ర పర్యాటక రంగ కృషిని కొనియాడుతూ.. దీపోత్సవ దృశ్యాలను ట్విట్టర్​లో పంచుకున్నారు.

దీపావళి సందర్భంగా ఉత్తర్‌ప్రదేశ్‌లోని అయోధ్య నగరంలోని సరయు నది తీరం లక్షల దీపాలతో వెలిగిపోయింది. ఒకేసారి 6లక్షల 6వేల 569 దీపాలు అయిదు నిమిషాల పాటు రామ్‌కీ పైడీ ఘాట్ల వద్ద కాంతులీనాయి. యూపీ సర్కార్​ తలపెట్టిన ఈ దీపోత్సవం గిన్నీస్ బుక్ రికార్డునూ సొంతం చేసుకుంది. తాజాగా ఆ రాష్ట్ర పర్యాటక రంగానికి, రామ్‌ మనోహర్ లోహియా అవథ్‌ విశ్వవిద్యాలయానికి గిన్నిస్‌ బుక్ సభ్యులు అభినందనలు తెలిపారు. 6,06,569 చమురు దీపాలు అయిదు నిమిషాల పాటు వెలుగొందాయంటూ ట్వీట్ చేయడం సహా.. ఆ సుందర దృశ్యాలను షేర్ చేశారు.

సీఎం అభినందనలు..

ఇదిలా ఉండగా.. ఈ దీపోత్సవాన్ని విజయవంతం చేయడంలో లోహియా విశ్వవిద్యాలయానికి చెందిన 8,000 మంది విద్యార్థులు కీలకపాత్ర పోషించారు. వారిని, అయోధ్య యంత్రాంగాన్ని రాష్ట్ర ముఖ్యమంత్రి యోగి ఆదిత్యనాథ్ అభినందించారు. ఆయన 2017లో అధికారంలోకి వచ్చిన దగ్గరి నుంచి ఏటా ఈ దీపోత్సవాన్ని నిర్వహిస్తున్నారు. ఎప్పటికప్పుడు దీపాల సంఖ్యను పెంచుతూ కొత్త రికార్డులు సృష్టిస్తున్నారు.

ఇదీ చదవండి:మహా దీపోత్సవ వెలుగుల్లో పులకించిన అయోధ్య