రఫేల్ ముడుపులపై రాజకీయ రగడ

రఫేల్ కుంభకోణాన్ని మళ్లీ తెరపైకి తీసుకొచ్చింది కాంగ్రెస్​.​ విమానాల కొనుగోలు ఒప్పందంపై క్షుణ్నంగా దర్యాప్తు చేయించాలని కోరింది. ప్రధాని నరేంద్ర మోదీ ఈ అంశంపై సమాధానం చెప్పాలని డిమాండ్​ చేసింది. ఒప్పందంలో మధ్యవర్తికి ముడుపులు అందినట్లు ఫ్రెంచ్​ మీడియాలో వార్తల నేపథ్యంలో ఈ మేరకు స్పందించింది. అయితే.. కాంగ్రెస్ ఆరోపణలను భాజపా తోసిపుచ్చింది.

రఫేల్​ యుద్ధ విమానాల కొనుగోలు వ్యవహారంపై మరోమారు రాజకీయ దుమారం రేగింది. ఈ ఒప్పందంలో అక్రమాలు జరిగాయన్న ఆరోపణలపై సమగ్ర దర్యాప్తు చేయించాలని కాంగ్రెస్​ కోరింది. రఫేల్​ జెట్​లను తయారు చేసే డసో సంస్థ.. కొందరు మధ్యవర్తులకు ముడుపులు చెల్లించిందన్న వార్తలపై ప్రధాని జవాబు చెప్పాలని డిమాండ్ చేసింది. ఈ వాదనల్ని తోసిపుచ్చిన భాజపా... విపక్షంపై ఎదురుదాడికి దిగింది.

రాహుల్​ అన్నదే నిజమైంది!

2016లో రఫేల్​ ఒప్పందం జరిగిన తర్వాత విమాన తయారీదారు 'డసో' సంస్థ మధ్యవర్తిగా వ్యవహరించిన భారత కంపెనీ 'డిఫ్సిస్'​ సొల్యూషన్స్​కు రూ.9 కోట్ల 48లక్షలు చెల్లించిందని ఫ్రెంచ్ అవినీతి నిరోధక సంస్థ దర్యాప్తులో తేలినట్లు ఫ్రెంచ్​ మీడియాలో వార్తలు వచ్చాయి. వీటిని విమర్శనాస్త్రాలుగా మలుచుకుంది కాంగ్రెస్. రఫేల్​ ఒప్పందంలో అవినీతి జరగిందని తమ పార్టీ అగ్రనేత రాహుల్ గాంధీ తరచూ చేసిన ఆరోపణలు నిజమయ్యాయని అన్నారు కాంగ్రెస్ అధికార ప్రతినిధి రణ్​దీప్​ సుర్జేవాలా.

'దేశ అతిపెద్ద రక్షణ ఒప్పందంలో భారత ప్రభుత్వంలో ఎవరికి, ఎంత మేరకు లంచాలు అందాయో తేల్చేందుకు దర్యాప్తు అవసరం లేదా?' అని ప్రశ్నించారు సుర్జేవాలా. ఈ ప్రశ్నలకు ప్రధాని మోదీనే సమాధానం చెప్పాలని డిమాండ్​ చేశారు. డసో సంస్థ మధ్యవర్తికి చెల్లించిన ఆ మొత్తాన్ని తమ ఖర్చుల ఖాతాలో క్లయింట్స్​కు గిఫ్ట్​ ఇచ్చినట్లు నమోదు చేసిందని ఆయన చెప్పారు. కానీ నిజానికి ఆ మొత్తం మధ్యవర్తికి చెల్లించిన కమీషన్ అని ఆరోపించారు. రక్షణ ఒప్పందంలో మధ్యవర్తికి కమీషన్​ ఇవ్వటం భారత ఆయుధ కొనుగోళ్ల విధానాన్ని ఉల్లంఘించడమేనని అన్నారు.

ఖండించిన భాజపా

కాంగ్రెస్​ ఆరోపణలను కేంద్ర న్యాయ శాఖ మంత్రి రవిశంకర్​ ప్రసాద్​ ఖండించారు. విమానాల కొనుగోలులో ఎలాంటి అవినీతి జరగలేదని సుప్రీంకోర్టు, కాగ్​ ఇప్పటికే తేల్చాయని స్పష్టం చేశారు.

ఇదీ చదవండి:అవినీతి కేసులో యడియూరప్పకు ఊరట