బంగాల్లో అధికారం సాధించి దశాబ్దాల కలను సాకారం చేసుకోవాలని భాజపా చూస్తోంటే.. ముచ్చటగా మూడోసారి అధికారంలోకి వచ్చేందుకు శ్రమిస్తోంది తృణమూల్ కాంగ్రెస్. భాజపా నుంచి గతంలో ఎన్నడూ లేనంత గట్టి పోటీని ఎదుర్కొంటోంది. ఈ దిగ్గజాల పోరులో తమ అస్తిత్వాన్ని కాపాడుకునేందుకు ప్రయత్నిస్తోన్న మహాకూటమి(వామపక్షం-కాంగ్రెస్-ఐఎస్ఎఫ్).. బంగాల్లో 'కింగ్ మేకర్' కావాలని ఆశిస్తోంది. ఈ కల ఏమేరకు నెరవేరుతుంది? అనుకున్నట్టు జరిగితే... ప్రభుత్వం ఏర్పాటులో కూటమి ఎలాంటి వ్యూహం అనుసరిస్తుంది?
'ఎర్ర'కోట నిర్మించేనా?
స్వాతంత్ర్యానంతరం బంగాల్ను ఆరు దశాబ్దాల పాటు సుదీర్ఘంగా పరిపాలించిన వామపక్షాలు.. గత కొన్నేళ్లుగా ఆ రాష్ట్ర రాజకీయాల్లో చివరి స్థానానికే పరిమితమయ్యాయి. 120 ఏళ్ల ఘన చరిత్ర కలిగిన కాంగ్రెస్ సైతం.. సమర్థమైన నాయకత్వం లేకపోవడం, అంతర్గత కలహాల వల్ల సతమతమవుతోంది. కొంతకాలంగా ఎన్నికల్లో వరుస దెబ్బలు తింటోంది. ఇలా చావుబతుకుల పోరాటం సాగిస్తున్న ఈ రెండు పార్టీలు... అనివార్య పరిస్థితుల్లో బంగాల్ శాసనసభ ఎన్నికల కోసం జట్టుకట్టాయి.
ప్రముఖ మత గురువు పీర్జాదా అబ్బాస్ సిద్ధిఖీ ఇటీవల స్థాపించిన ఇండియన్ సెక్యూలర్ ఫ్రంట్ (ఐఎస్ఎఫ్) కూటమిలో చేరడం కాంగ్రెస్, వామపక్షాల్లో కాస్త ఆశలు చిగురింపచేసింది. మహాకూటమి 'సంయుక్త మోర్చా'గా అవతరించింది. టీఎంసీ, భాజపా ఓట్లను కొల్లగొట్టి, రాజకీయంగా కీలక శక్తిగా ఎదగాలని ఆశిస్తోంది.
" మా కూటమి బంగాల్ ఎన్నికల్లో 'గేమ్ ఛేంజర్' అవుతుందని మేము నమ్ముతున్నాము. బంగాల్లో ద్విముఖ పోరు నడుస్తోందని భాజపా, తృణమూల్ కాంగ్రెస్ చెబుతున్నాయి. కానీ బంగాల్లో త్రిముఖ పోరు నడుస్తోంది."
-- మహ్మద్ సలీం, సీపీఎం నేత
తమ కూటమి అందరూ ఆశ్చర్యపడే స్థాయిలో విజయం సాధిస్తుందని ధీమా వ్యక్తం చేశారు కాంగ్రెస్ నేత ప్రదీప్ భట్టాచార్య.
'మైనారిటీ ఓట్లు మావే'
కూటమి నేతలు ఇంత ధీమాగా ఉండడానికి కారణం... ఐఎస్ఎఫ్. పీర్జాదా రాకతో బంగాల్లో అధిక శాతం మైనారీటీ ఓట్లు తమకే దక్కుతాయన్న ఆశతో ఉంది 'సంయుక్త మోర్చా'. నిజానికి... ఉత్తర బంగాల్లో మాత్రమే కాంగ్రెస్కు మైనారిటీల మద్దతు ఉంది. మిగిలిన అన్ని ప్రాంతాల్లో వారి ఓట్లు టీఎంసీకే. ఇప్పుడు పీర్జాదా చేరికతో ఆయా చోట్ల కూడా మైనారిటీలు తమవైపు మళ్లొచ్చని లెక్కలేసుకుంటున్నాయి కాంగ్రెస్, వామపక్షాలు. ఇదే అంచనాతో ఉన్న భాజపా సైతం... ఐఎస్ఎఫ్ అరంగేట్రంపై లోలోన సంతోషపడుతోంది. మైనారిటీల్లో మమతా బెనర్జీకి ఉన్న పట్టుపై కొంతవరకైనా ఆ పార్టీ ప్రభావం చూపుతుందని ఆశిస్తోంది.
అస్తిత్వ పోరు!
2016 అసెంబ్లీ ఎన్నికల్లో వామపక్ష- కాంగ్రెస్ కూటమి 36 శాతం ఓట్లు రాబట్టింది. ఆ తర్వాత కూటమి ఓట్ల శాతం గణనీయంగా తగ్గుతూ వస్తోంది. 2019 లోక్సభ ఎన్నికల్లో ఇరు పార్టీలు వేరువేరుగా పోటీ చేశాయి. కాంగ్రెస్కు ఏడు శాతం, వామపక్షాలకు ఐదు శాతం ఓట్లు దక్కాయి. ఆ ఎన్నికల్లో వామపక్షాలు ఖాతా తెరవలేదు. మొత్తం 42 లోక్సభ సీట్లలో కాంగ్రెస్ రెండింట గెలిచింది. మరోవైపు భాజపా 18 సీట్లు సాధించగా.. అధికార తృణమూల్ కాంగ్రెస్కు 22 సీట్లు దక్కాయి.
ఈ పరిస్థితిని ఎలాగైనా మార్చి, ప్రజల మద్దతును తిరిగి సంపాదించుకోవాలని చూస్తున్నాయి మహాకూటమిలోని ప్రధాన పార్టీలు.
"రాజకీయ అస్తిత్వం కోసం పోరాటం చేస్తున్న మాకు ప్రస్తుతం వామపక్షాలు, ఐఎస్ఎఫ్ భాగస్వామ్యం ఎంతో అవసరం. తృణమూల్ కాంగ్రెస్ ముస్లిం ఓట్లపై, భాజపా హిందూ ఓట్లపై దృష్టి సారించాయి. వామపక్ష, కాంగ్రెస్ నేతలకు ఎర వేయటంపైనే టీఎంసీ దృష్టి సారించటం వల్ల బంగాల్లోకి భాజపా వచ్చేందుకు మార్గం సుగమమైంది.
రాష్ట్రంలో ఎన్నడూ లేనంతగా మతతత్వ రాజకీయాలు సాగుతున్నాయి. ఇలాంటి సమయంలో ఐఎస్ఎఫ్తో పొత్తు ఎంతో అవసరం. గత ఎన్నికల్లో మేము గెలిచిన 77 సీట్లలో అత్యధికం... మైనారిటీలు ఎక్కువగా ఉండే ముర్షీదాబాద్, మాల్డా, ఉత్తర దినాజ్పుర్, దక్షిణ దినాజ్పుర్లోనివే. కనీసం ఆయా స్థానాలను నిలబెట్టుకోవాలంటే మేము ఐఎస్ఎఫ్తో పొత్తు పెట్టుకోవడం తప్పనిసరి."
--- అబ్దుల్ మన్నన్, కాంగ్రెస్ నేత
294 నియోజకవర్గాలున్న బంగాల్లో ఈసారి వామపక్షాలు 177 స్థానాల్లో పోటీ చేస్తున్నాయి. కాంగ్రెస్ 91, ఐఎస్ఎఫ్ 26 స్థానాల్లో బరిలోకి దిగుతున్నాయి.