ఉత్తరాఖండ్లో భారీ వర్షాలు(Rains in uttarakhand) బీభత్సం సృష్టిస్తున్నాయి. పిథోర్గఢ్ జిల్లా ధార్చులా తాలుకాలోని జుమ్మా గ్రామంలో ఆదివారం రాత్రి కొండచరియలు(Landslide) విరిగిపడ్డాయి. ఈ ఘటనలో ముగ్గురు చిన్నారులు ప్రాణాలు కోల్పోగా.. మరో నలుగురు గల్లంతయ్యారు. ఏడు ఇళ్లు నేలమట్టమయ్యాయి. సహాయక చర్యలు కొనసాగుతున్నాయి.
ఈ ప్రమాద సమాచారం అందుకున్న వెంటనే.. అధికారులతో జిల్లా కలెక్టర్ ఆశిష్ చౌహాన్ సమావేశం నిర్వహించారు. సహాయక చర్యలను నిర్విరామంగా చేపట్టాలని ఆదేశించారు. అత్యవసర సామగ్రిని ఆ ప్రాంతానికి పంపించారు. ఎస్పీతో కలిసి ఘటనాస్థలికి వెళ్లి స్వయంగా పరిశీలించారు.
జుమ్మా గ్రామంలో రాకపోకలు స్తంభించగా.. సహాయక చర్యల కోసం ఓ హెలీప్యాడ్ను సిద్ధం చేస్తున్నట్లుగా ఆశిష్ చౌహాన్ తెలిపారు. సహాయక చర్యల కోసం ఎన్డీఆర్ఎఫ్ సిబ్బందిని పింపించినట్లు పేర్కొన్నారు.