మూలికల సుగంధాన్ని వెదజల్లే మట్టి ఇల్లు​.. ప్రపంచంలోనే తొలిసారి..

clay house India: ఇంటి నిర్మాణం కోసం ఇటుక, ఇసుక, కంకర, కర్ర వంటివి అవసరం. కానీ, ఆయుర్వేద మూలికల సుగంధాన్ని వెదజల్లే మట్టి ఇంటి గురించి విన్నారా? ప్రపంచంలోనే తొలిసారి కేరళలో అలాంటి ఇల్లు నిర్మించారు. మరి ఆ ఇంటి విశేషాలు తెలుసుకుందాం రండి..

clay house India: ఈ ఇల్లు అరుదైన ఆయుర్వేద మూలికల సుగంధాన్ని వెదజల్లుతుంది. ఇంటికి కనీసం విద్యుత్తు సరఫరా కూడా లేదు. కానీ ఏసీ వంటి చల్లదనాన్ని ఇస్తుంది. 65కుపైగా ఆయుర్వేద మూలికలను మట్టితో కలిపి నిర్మించిన ప్రత్యేకమైన ఈ ఇల్లు కేరళ, పతనంతిట్ట జిల్లా అదూర్​ మున్సిపాలిటీ పరిధిలోని నెల్లిముకల్​ అనే గ్రామంలో ఉంది.

మృన్మయమ్​

'మృన్మయమ్​'గా పిలిచే ఈ ఇంటిని ఎర్నాకులానికి చెందిన జాకబ్​ తంగచన్​ అనే వ్యక్తి నిర్మించారు. ఇల్లు కట్టేందుకు మూలికలు, చేపల కొవ్వు ఉపయోగించడం విశేషం. ఇందుకోసం చేపలను ముందుగా ఓ ట్యాంకులో వేస్తారు. వాటి కొవ్వు నీటిలో చేరాక.. ఆ నీటిని మట్టి, మూలికలు కలిపేందుకు ఉపయోగిస్తారు.

మూలికలు కలగలిసిన మట్టితో నిర్మించిన ఈ ఇంటి లోపల ఎంతో ఆహ్లాదకరంగా ఉంటుందని, కనీసం ఫ్యాన్​ కూడా అవసరం లేదని చెబుతున్నారు యజమాని జాకబ్​ తంగచన్​. చల్లగా, సువాసనలు వెదజల్లుతూ, సేద తీరేందుకు అనువైన ప్రదేశంగా ఉంటుందని అంటున్నారు. ఒకే గది ఉన్న ఈ ఇంటిని నిర్మించేందుకు ఏడాదికిపైగా సమయం పట్టిందని తెలిపారు​ జాకబ్.

మట్టిలో కలిపేందుకు సిద్ధం చేస్తున్న మూలికలు

నీటి ట్యాంక్​లోని చేపలు

" ఇలాంటి ఆయుర్వేద ఇళ్ల గురించి విన్నాం కానీ, ఎక్కడా చూడలేదు. అందుకే నిర్మించాలనుకున్నాం. ఇప్పుడు మూలికలు ఎక్కడ దొరుకుతాయో మాకు తెలుసు. కేవలం 8 నెలల్లోనే ఇంటిని నిర్మిచగలం. మట్టితో మూలికలను కలిపేందుకు చాలా కారణాలు ఉన్నాయి. ప్రధానంగా ఇంటిలోపల చల్లదనం, సువాసనలు వెదజల్లేందుకు అలా చేశాం. కొన్ని మూలికలు చెదపురుగులను నివారించేందుకు, కొన్ని మట్టిని బలోపేతం చేసేందుకు ఉపయోగించాం. "

- శీలా సంతోశ్​​, ఆర్కిటెక్ట్​

ఆర్కిటెక్ట్​ శీలా సంతోశ్​ బృందం ఇంటి నిర్మాణంలోని అన్ని దశల వివరాలను నమోదు చేశారు. ప్రపంచ రికార్డ్​ కోసం వాటిని సమర్పించేందుకు ప్రణాళికలు రచిస్తున్నారు.

ఇదీ చూడండి:వేల లీటర్ల నీటిని మింగేస్తున్న 'మాయా బావి'