కఠినమైన శీతాకాలం దగ్గరపడుతున్నా.. చైనా గుడ్లురుమి భారత్‌ను భయపెట్టాలనే ప్రయత్నాలను మానడంలేదు. తాజాగా ఇరు దేశాల మధ్య సరిహద్దు వివాదంపై 13వ విడత సైనిక కమాండర్ల స్థాయి చర్చలు విఫలం అయ్యాయి. దీంతో డ్రాగన్ మళ్లీ తన పంథాను అనుసరించడం మొదలుపెట్టింది. సరిహద్దులకు భారీ ఎత్తున ఆయుధాలను తరలిస్తోంది. కానీ, ఆయుధాలు కాదు.. చైనా జవాన్లు అతిశీతల వాతావరణానికి అలవాటు పడాలని ఆ దేశ సైనిక నిపుణులు అంటున్నారు. మరోపక్క చైనా ఆయుధ తరలింపును ఈస్టర్న్‌ కమాండర్‌ మనోజ్‌ పాండే కూడా ధ్రువీకరించారు. భారత్ కూడా తగిన ఏర్పాట్లు చేస్తోందని చెప్పారు.
ఏం జరుగుతోంది..
వాస్తవాధీన రేఖ వెంట చైనా అత్యాధునిక 100 దీర్ఘశ్రేణి రాకెట్ లాంఛర్లను తరలించింది. ఈ విషయాన్ని చైనా సైనిక వర్గాలు 'సౌత్‌ చైనా మార్నింగ్‌' పోస్టు వద్ద ధ్రువీకరించాయి. శీతాకాలం వస్తుండటంతో చైనా తమ రక్షణ వ్యవస్థలను మరింత బలోపేతం చేసుకోవడంలో భాగంగా ఈ చర్యలు చేపట్టింది. భారత్ ఇప్పటికే అత్యాధునిక ఎం777 అల్ట్రాలైట్‌ హోవిట్జర్లను హిమశిఖరాలకు తరలించింది. తాజాగా చైనా 100 పీసీఎల్‌-181 లైట్‌ ట్రక్‌ మౌంటెడ్‌ హోవిట్జర్లను ఎల్‌ఏసీ వద్దకు తీసుకొచ్చింది. భారత్ వాడే ఎం777 కంటే ఇవి రెట్టింపు దూరంలోని లక్ష్యాలను ఛేదిస్తాయని పీఎల్‌ఏ చెబుతోంది.
ఇప్పటికే పీసీఎల్‌-191లను మోహరించిన డ్రాగన్
తాజాగా వచ్చిన పీసీఎల్‌-181 కంటే శక్తిమంతమైన పీసీఎల్‌-191 హోవిట్జర్లను ఏప్రిల్‌ నెలలోనే పీపుల్స్‌ లిబరేషన్‌ ఆర్మీ ఎల్‌ఏసీ వద్దకు చేరవేసింది. ఈ విషయాన్ని అప్పట్లో చైనా ప్రభుత్వానికి చెందిన సీసీటీవీ ధ్రువీకరించింది. ఇది దాదాపు 500 కిలోమీటర్ల దూరంలోని లక్ష్యాలపై కూడా దాడి చేయగలదని పేర్కొంది. వేర్వేరు దూరాల్లోని లక్ష్యాలను ఛేదించడం కోసం పీఎల్‌ఏ వీటిల్లోని రకాలను మోహరిస్తున్నట్లు మకావ్‌కు చెందిన సైనిక నిపుణులు ఆంటోనీ వాంగ్‌ టాంగ్‌ పేర్కొన్నారు. అంతేకాదు ఇక్కడ ఆయుధాల కంటే వణికించే శీతాకాలాన్ని ఎదుర్కోవడం అసలు సిసలైన సవాల్‌ అని పేర్కొన్నారు. బీజింగ్‌కు చెందిన సైనిక నిపుణుడు ఝూవా ఛెన్‌మింగ్‌ కూడా ఇటువంటి అభిప్రాయాన్నే వ్యక్తం చేశారు. శీతాకాలాన్ని తట్టుకొని నిలబడటమే పీపుల్స్‌ లిబరేషన్‌ ఆర్మీ ప్రథమ ప్రాధాన్యమన్నారు.
చినూక్‌ల సాయంతో భారత్ శతఘ్నుల తరలింపు..
అమెరికా నుంచి కొనుగోలు చేసిన చినూక్‌ హెలికాప్టర్లు భారత్‌కు అద్భుతంగా ఉపయోగపడుతున్నాయి. ఇటీవల సెప్టెంబర్‌లో ఎం777 లైట్‌ హెవిట్జర్లను భారత్ వీటి సాయంతోనే అక్కడకి తరలించింది. మిగిలిన భారీ శతఘ్నులు రోడ్డుమార్గంలో వెళ్లాయి. మరోపక్క భారత్ కూడా హిమసీమల్లో రెండో శీతాకాలం ఎదుర్కోవడానికి వేగంగా ఏర్పాట్లు చేసుకొంటోంది. దీంతో చైనా సైనికుల కదలికలను గుర్తించేందుకు శక్తిమంతమైన నిఘా నేత్రాలను ఏర్పాటు చేసింది.
భారత్ ఎటువంటి టెక్నాలజీ వాడుతోంది..
ఈ సారి శీతాకాలంలో వాస్తవాధీన రేఖపై ఈస్ట్రన్‌ కమాండ్‌ మరింత దృష్టిపెట్టింది. దీనిలో భాగంగా సైనికుల సంఖ్యపై కాకుండా టెక్నాలజీని నమ్ముకొంది. ఇందు కోసం సరిహద్దుల వెంట భారీ సంఖ్యలో రాడార్లు, సెన్సర్లు, కెమెరాలు, మోషన్ డిటెక్టర్లును ఏర్పాటు చేసింది. ఇవన్నీ దేశీయంగా అభివృద్ధి చేసిన కృత్రిమ మేధ ఆధారంగానే పనిచేస్తాయి. అంతేకాదు ఉపగ్రహాల నుంచి సేకరించిన చిత్రాలను ఎప్పటికప్పుడు విశ్లేషించుకుంటోంది. దీంతో ఎల్‌ఏసీ, చైనా భూభాగంలో పీఎల్‌ఏ కదలికలను స్పష్టంగా తెలుసుకోవచ్చు. వాస్తవానికి ఇటువంటి టెక్నాలజీని అరుణాచల్‌ ప్రదేశ్‌లో పూర్తిగా ప్రవేశపెట్టేందుకు కొన్నేళ్లుగా ప్రయత్నాలు జరుగుతున్నా.. తాజా పరిస్థితుల నేపథ్యంలో వాస్తవాధీన రేఖ మొత్తానికి విస్తరించనున్నారు. ఇది పూర్తియితే చైనా సైనికుల కదలికలు మన దళాలకు పూర్తిగా తెలుస్తాయి. 4వ కోర్‌ అధీనంలోని నిఘా కేంద్రం సరిహద్దుల్లో అమర్చిన చాలా పరికరాల నుంచి వచ్చే సమాచారాన్ని విశ్లేషిస్తోంది. దీనిలో ఎల్‌ఏసీ ఆవలవైపు చైనా భూభాగంలో పీఎల్‌ఏ సైనికుల బంకర్లు, వారి కదలికలు స్పష్టంగా భారత్‌కు తెలుస్తున్నాయి.
నిఘా కోసం వినియోగించే దీర్ఘశ్రేణి డ్రోన్ల విషయంలో కూడా సైన్యం కీలక మార్పులు చేసింది. ఇప్పటి వరకు ఈస్ట్రన్‌ కమాండ్‌లోని ఆర్టలరీ కోర్‌ కింద ఉన్న డ్రోన్లను ప్రస్తుతం ఆర్మీ ఏవియేషన్‌ కోర్‌ పరిధిలోకి తీసుకొచ్చారు. దీంతో సమన్వయ లోపానికి అవకాశం లేదని చెబుతున్నారు.