Chicken and panner for blood donors: 'అన్ని దానాల్లోకెల్లా రక్తదానం ఎంతో గొప్పది' అంటూ ఉంటారు. మనం చేసే రక్తదానంతో ఇతరులకు కొత్త జీవితాలు అందుతాయి. మరి అంతటి విలువైన రక్తాన్ని దానం చేసేవారిని ప్రోత్సహించేందుకుగాను మహారాష్ట్రలో ఓ రక్తదాన శిబిర నిర్వాహకులు వినూత్నంగా ఆలోచించారు. రక్తదాతలు నాన్ వెజిటేరియన్ అయితే వారికి 2కిలోల చికెన్ అందించారు. వెజిటేరియన్ అయితే.. అర్ధకిలో పనీర్ అందించారు.
Blood shortage in maharashtra: కరోనా కారణంగా రక్తదాతలు ఎవరూ ముందుకు రాకపోవడం వల్ల మహారాష్ట్రలో తీవ్ర రక్త కొరత ఏర్పడింది. ఫలితంగా వివిధ వ్యాధులతో బాధపడే వారు తీవ్ర ఇబ్బందులు ఎదుర్కొన్నారు. ఈ నేపథ్యంలో రాష్ట్రంలోని పలు ప్రాంతాల్లో రక్తదాన శిబిరాలను ఏర్పాటు చేయాలని, ప్రజలంతా స్వచ్ఛందంగా రక్తదానం చేసేందుకు ముందుకు రావాలని మహారాష్ట్ర ప్రభుత్వం పిలుపునిచ్చింది. ఈ క్రమంలో ఎన్సీపీ చీఫ్ శరద్ పవార్ పుట్టినరోజును పురస్కరించుకుని పుణెలోని కోథ్రూడ్ ప్రాంతంలో మాజీ కార్పొరేటర్ శంకర్ కేమ్సే ఓ రక్తదాన శబిరాన్ని ఏర్పాటు చేశారు. రక్తదానం చేసినవారికి ఆయన చికెన్, పనీర్ అందజేశారు. కార్యక్రమంలో చాలా మంది యువతీయవకులు ఉత్సాహంగా పాల్గొని తమ రక్తాన్ని దానం చేశారు.