ఘోర రోడ్డు ప్రమాదం- ఎమ్మెల్యే కుమారుడు మృతి

కారు, బస్సు ఢీకొన్న ఘటనలో కాంగ్రెస్ ఎమ్మెల్యే కుమారుడు మృతిచెందారు. అతనితోపాటు మరో ఇద్దరు అధికారులు ప్రాణాలు కోల్పోయారు. ఈ ఘటన ఛత్తీస్​గఢ్​లో జరిగింది.

ఛత్తీస్​గఢ్​ కోర్బా జిల్లా బింజ్రా గ్రామం వద్ద మంగళవారం ఘోర రోడ్డు ప్రమాదం జరిగింది. ఎదురుగా వస్తున్న ప్రైవేట్ బస్సును కారు ఢీ కొట్టింది. ఈ ఘటనలో కారులో ప్రయాణిస్తున్న ముగ్గురు అక్కడికక్కడే మృతి చెందారు.

మృతుల్లో మర్వాహీ నియోజకవర్గం కాంగ్రెస్ ఎమ్మెల్యే కృష్ణ కుమార్ ధ్రువ్​ కుమారుడు ప్రవీణ్ కుమార్ ధ్రువ్(32) ఒకరు. మరో ఇద్దరు శంకర్ సింగ్ పోర్టే(28), కుషాల్ కుమార్ కన్వార్(32)గా పోలీసులు గుర్తించారు. వారంతా.. విద్యుత్ శాఖలో ఇంజినీర్లుగా పనిచేస్తున్నట్లు తెలిపారు.

ఈ ఘటనపై ఛత్తీస్​గఢ్ సీఎం భూపేశ్ భగేల్ దిగ్భ్రాంతి వ్యక్తం చేశారు. మృతుల కుటుంబాలకు సానుభూతి తెలిపారు.

ఇదీ చదవండి:అంతుచిక్కని జ్వరం.. ఐదుగురు చిన్నారులు మృతి!