భద్రతా సిబ్బందిని వైద్య సాయం కోరిన మావోయిస్టులు

ఛత్తీస్‌గఢ్‌లో కొవిడ్​ పాజిటివ్​ తేలిన మావోయిస్టు దంపతులు.. భద్రతా దళాలను వైద్య సాయం కోరారు. ప్రస్తుతం వారు ఆస్పత్రిలో చికిత్స పొందుతుండగా.. వారు కోలుకున్న తర్వాత లొంగుబాటు ప్రక్రియ కొనసాగుతుందని అధికారులు తెలిపారు. మరికొంతమంది నక్సల్స్ కూడా కరోనాతో బాధపడుతున్నట్లు సమాచారం.

కరోనా సోకిన మావోయిస్ట్​ దంపతులు.. భద్రతా సిబ్బందిని వైద్య సాయం కోరారు. ఈ సంఘటన ఛత్తీస్‌గఢ్‌ కంకర్ జిల్లాలో జరిగింది. ఆ దంపతులిద్దరూ కంకర్​లోని కొవిడ్​ ఆసుపత్రిలో చికిత్సపొందుతున్నారు.

మావోయిస్టుల మెడ్కి లోకల్​ ఆర్గనైజేషన్​ స్క్వాడ్​లో చురుకుగా పనిచేస్తున్న అర్జున్​ తట్టి, అతని భార్య లక్ష్మి పద్దా.. కామ్‌డేటా బీఎస్‌ఎఫ్​ శిబిరంలోని భద్రతా సిబ్బందిని సంప్రదించి.. తాము అనారోగ్యంతో ఉన్నామని, సహాయం చేయాలని అభ్యర్థించినట్లు బస్తర్​ రేంజ్​ ఐజీ సుందరాజ్​ తెలిపారు. అలాగే వారు కోలుకున్న తర్వాత వారి లొంగిపోయే ప్రక్రియ జరుగుతుందని ఆయన పేర్కొన్నారు.

కరోనా వల్లే కావచ్చు!

'సుక్మా బీజాపూర్ జిల్లాల దక్షిణ భాగంలో పదిమందికిపైగా నక్సల్స్​ చనిపోగా.. మరికొందరు తీవ్ర అనారోగ్యంతో ఉన్నట్లు సమాచారం అందిందని' అని సుందర్‌రాజ్​ తెలిపారు. అయితే ఈ ఆకస్మిక మరణాలకు కారణమేంటన్నది స్పష్టంగా తెలియలేదని పేర్కొన్న ఆయన.. కరోనా వల్లే చనిపోయినట్లు క్షేత్రస్థాయి నివేదికలు సూచిస్తున్నాయని తెలిపారు.

అనారోగ్యం పాలైన మావోయిస్టులు లొంగిపోయి ప్రభుత్వ ఆసుపత్రులలో చికిత్స పొందాలని ఆయన విజ్ఞప్తి చేశారు.

ఇదీ చూడండి:టైమ్స్​ గ్రూప్​ ఛైర్​పర్సన్​ జైన్​ మృతి- ప్రధాని సంతాపం