PM Shri schools: నూతన విద్యా విధానం అమలులో భాగంగా కేంద్ర ప్రభుత్వం మరో నిర్ణయం తీసుకుంది. భవిష్యత్తుకు అనుగుణంగా విద్యార్థులను సన్నద్ధం చేయాలనే లక్ష్యంతో 'పీఎం శ్రీ స్కూల్స్'ను ప్రారంభించనుంది. ఈ మేరకు కేంద్ర విద్యాశాఖ మంత్రి ధర్మేంద్ర ప్రధాన్ గురువారం ప్రకటించారు. నూతన విద్యావిధానంపై గుజరాత్లో జరిగిన సమావేశంలో ఆయన పాల్గొన్నారు. ఈ పాఠశాలలను నూతన విద్యావిధానానికి ప్రయోగశాలగా అభివర్ణించారు.
"భారత్ను ప్రతిభగల ఆర్థిక వ్యవస్థగా మార్చడానికి వచ్చే 25 సంవత్సరాలు కీలకమైనవి. మనమందరం కలిసి పనిచేద్దాం. మన అనుభవాలను పంచుకుని దేశాన్ని ఉన్నత శిఖరాలకు తీసుకెళ్లాలా కృషి చేద్దాం. పాఠశాల విద్య అనేది విద్యార్థికి పునాది. అత్యాధునిక సదుపాయాలతో పీఎం స్కూల్స్ను స్థాపిస్తాం. 21 శతాబ్దంలోని నైపుణ్యాలను విద్యార్థులకు అందిస్తాం."
--ధర్మేంద్ర ప్రధాన్, కేంద్ర విద్యాశాఖ మంత్రి
ఆజాదీ కా అమృత్ మహోత్సవ్ వేడుకలు జరుపుకుంటున్న ఈ తరుణంలో నేషనల్ అచీవ్మెంట్ సర్వే 2021 తమలో విశ్వాసాన్ని నింపిందన్నారు ప్రధాన్. విద్యా రంగంలోని లోపాలు సరిదిద్దుకుని.. వ్యవస్థను పటిష్ఠ పరిచి నాణ్యమైన విద్య అందించడానికి రాష్ట్రాలు కృషి చేస్తున్నాయని ఈ సర్వే స్పష్టం చేసిందని గుర్తుచేశారు. విద్యార్థులకు నాణ్యమైన డిజిటల్ విద్యను అందించేలా రాష్ట్రాలు, కేంద్ర పాలిత ప్రాంతాలు భాగస్వామ్యం తీసుకోవాలని ఆయన కోరారు. దేశ యువత విశ్వ పౌరులుగా మారడానికి విద్య ఎంతో ఉపయోగపడుతుందన్నారు. 2001 లో మాజీ ప్రధానమంత్రి అటల్ బిహారీ వాజ్పేయి ప్రారంభించిన సర్వ శిక్షా అభియాన్ విద్యా రంగంలో అనేక మార్పులు తీసకువచ్చిందని చెప్పారు. నూతన విద్యా విధానం మాతృభాషలో నేర్చుకోవడానికి, నైపుణ్యాభివృద్ధికి నూతన విద్యా విధానం ఎంతో ప్రాధాన్యం ఇస్తోందని పేర్కొన్నారు ప్రధాన్.
NEP 2020 implementation: నూతన విద్యా విధానంలో.. పాఠశాల విద్యావ్యవస్థ ఆరు విభాగాలుగా మారింది. పూర్వ ప్రాథమిక విద్య 1, 2 శాటిలైట్ ఫౌండేషన్ బడులుగా మారాయి. ప్రీ ప్రైమరీ 1,2 సహా ఒకటి, రెండు తరగతులు ఉంటే ఫౌండేషన్, 1 నుంచి 5 తరగతులు ఉంటే ఫౌండేషన్ ప్లస్గా మార్పు చెందాయి. 3 నుంచి 8వ తరగతి వరకు ఉంటే ప్రీ హైస్కూళ్లు, 3 నుంచి 10వ తరగతి వరకు ఉంటే ఉన్నత పాఠశాలలు, 3 నుంచి 12 వరకు ఉంటే హైస్కూల్ ప్లస్గా మారాయి.
ఇదీ చదవండి:యూపీఎస్సీ వైస్ ప్రిన్సిపల్, లెక్చరర్ ఉద్యోగాలు.. ఆ ఏజ్ వారికీ ఛాన్స్!
