కొవిడ్ కారణంగా మరణించిన వారి కుటుంబ సభ్యులకు రూ.4 లక్షల పరిహారం అందించాలని కోరుతూ దాఖలైన పిటిషన్లపై కేంద్రం అఫిడవిట్ దాఖలు చేసింది. బాధిత కుటుంబాలకు నాలుగేసి లక్షల చొప్పున పరిహారం అందించలేమని కేంద్రం స్పష్టం చేసింది. ఇప్పటికే అనేక మందికి వివిధ రూపాల్లో పరిహారం అందించామని.. ఈ అంశంపై చాలా రాష్ట్రాలు చర్యలు చేపడుతున్నాయని సర్వోన్నత న్యాయస్థానం దృష్టికి తీసుకువచ్చింది కేంద్రం.
కేంద్ర, రాష్ట్ర ప్రభుత్వాలు కరోనా మహమ్మారి నివారణకు భారీ మొత్తాన్ని ఖర్చు చేశాయని.. సుప్రీంకోర్టుకు సమర్పించిన అఫిడవిట్‌లో కేంద్రం పేర్కొంది. ఆర్థిక వ్యవస్థపై భారం పడినప్పటికీ.. అవసరంలో ఉన్నవారి కోసం రాష్ట్ర ప్రభుత్వాలు పెద్ద ఎత్తున నిధులు సమకూరుస్తున్నాయని తెలిపింది. ఆర్థిక అవరోధాలు, ఇతర కారణాల వల్ల కరోనా మృతుల బంధువులకు పరిహారాన్ని చెల్లించలేమని కేంద్రం వివరించింది.