కేంద్రం సాయంపై శరద్​ పవార్​ కీలక వ్యాఖ్యలు

కరోనాను కట్టడి చేయడంలో మహారాష్ట్ర ప్రభుత్వానికి సహకరిస్తామని కేంద్రం హామీ ఇచ్చిందని ఎన్​సీపీ అధినేత శరద్​ పవార్​ తెలిపారు. ఈ మేరకు తాను కేంద్ర ఆరోగ్య మంత్రి హర్షవర్ధన్​తో మాట్లాడానని చెప్పారు. కొవిడ్​ టీకా విషయంలో మహారాష్ట్ర ప్రభుత్వానికి, కేంద్రానికి మధ్య మాటల యుద్ధం కొనసాగుతున్న క్రమంలో శరద్​ పవార్​ వ్యాఖ్యలకు ప్రాధాన్యత ఏర్పడింది.

మహారాష్ట్రలో కొవిడ్​ ఉద్ధృతి కొనసాగుతున్న నేపథ్యంలో రాష్ట్ర ప్రభుత్వానికి సాయం చేస్తామని కేంద్రం హామీ ఇచ్చినట్లు ఎన్​సీపీ అధినేత శరద్​ పవార్​ పేర్కొన్నారు. ఈ మేరకు తాను కేంద్ర వైద్య ఆరోగ్య శాఖ మంత్రి హర్షవర్ధన్​తో బుధవారం మాట్లాడానని చెప్పారు. మహారాష్ట్రతో పాటు ఇతర రాష్ట్రాల్లోనూ కరోనా పరిస్థితులను ఎదుర్కోవడంలో అండగా ఉంటామని హర్షవర్ధన్​ హామీ ఇచ్చారని చెప్పారు.

"మహారాష్ట్రలో కరోనా పరిస్థితి భయానకంగా ఉంది. పరిస్థితి తీవ్రతను అర్థం చేసుకొని సహకరించాలని నేను అందరినీ కోరుతున్నాను. పౌరుల ప్రాణాలను కాపాడేందుకు కొన్ని కఠిన చర్యలు అవసరం. కేంద్రం కూడా సాయం చేస్తోంది. రాష్ట్రంలో కరోనా పరిస్థితులపై నేను కేంద్ర మంత్రి హర్షవర్ధన్​తో మాట్లాడాను."

- శరద్​ పవార్​,ఎన్​సీపీ చీఫ్

కొవిడ్​ టీకా సరఫరా.. నిల్వలపై కేంద్రం, మహారాష్ట్ర ప్రభుత్వాల మధ్య రగడ నెలకొన్న వేళ.. శరద్​ పవార్​ వ్యాఖ్యలు ప్రాధాన్యం సంతరించుకున్నాయి. అంతకుముందు రాష్ట్రంలో వ్యాక్సిన్​ కొరత ఉందని మహారాష్ట్ర ప్రభుత్వం చెప్పింది. అయితే.. అసలు కొరతే లేదని, తన వైఫల్యాలను కప్పి పుచ్చుకోవడానికేమహారాష్ట్ర సర్కార్​ అలా చెబుతోందని కేంద్రం తోసిపుచ్చింది. కరోనాను ఎదుర్కోవడంలో ఉదాసీనంగా వ్యవహరిస్తోందని మండిపడింది.

'అంతరార్థం ఏంటో తెలియదు'

శరద్​ పవార్​ తాజాగా చేసిన ప్రకటనకు అంతరార్థం ఏమిటో తమకు తెలియదని భాజపా విమర్శించింది. కరోనాను ఎదుర్కోవడంలో రాష్ట్రానికి కేంద్రం కావాల్సినంత మద్దతు ఇస్తోందని చెప్పింది.

"శరద్​ పవార్ ప్రకటనకు సంబంధించి రాజకీయ అర్థం ఏంటో నాకు తెలియదు. కానీ, రాష్ట్ర ప్రభుత్వానికి కేంద్రం సహకరిస్తూనే ఉంది. కోటి టీకా డోసులను కేంద్రం ఇచ్చింది. కానీ, చాలా డోసులు ఎందుకు వృథా అయ్యాయి​" అని మహారాష్ట్ర భాజపా అధ్యక్షుడు చంద్రకాంత్​ పాటిల్​ ప్రశ్నించారు.

ఇదీ చూడండి:'మహా'లో కరోనా రికార్డు- ఒక్కరోజే 60 వేల కేసులు