మెడికల్​ ప్రాక్టీస్​ చేసేందుకు వారికి కేంద్రం అనుమతి

వైద్య విద్యార్హతలు ఉన్న కేంద్ర ప్రభుత్వ ఉద్యోగులు.. మెడికల్​ ప్రాక్టీసు, టెలీ కన్​సల్టేషన్​ సేవలు అందించేందుకు కేంద్రం అనుమతి ఇచ్చింది. అయితే.. ఖాళీ సమయాల్లో, పూర్తి స్వచ్ఛందంగా మాత్రమే ఇందులో పాల్గొనాలని స్పష్టం చేసింది.

దేశంలో కరోనా విజృంభణ నేపథ్యంలో... వైద్య విద్యార్హతలు కలిగిన కేంద్ర ప్రభుత్వ ఉద్యోగులు మెడికల్​ ప్రాక్టీసు, టెలీకన్​సల్టేషన్​ సేవలు అందించేందుకు కేంద్రం అనుమతి ఇచ్చింది. అయితే.. ఖాళీ సమయాల్లో, స్వచ్ఛందంగా మాత్రమే ఇందులో పాల్గొనాలని తెలిపింది. ఈ మేరకు కేంద్ర సిబ్బంది, శిక్షణ వ్యవహారాల మంత్రిత్వ శాఖ(డీఓపీటీ) ఉత్తర్వులు జారీ చేసింది. ప్రస్తుత సంక్షోభ సమయంలో టెలీకన్​సల్టేషన్ సేవలను అందించడానికి కేంద్ర ప్రభుత్వ ఉద్యోగుల నుంచి సలహాలను స్వీకరిస్తున్నట్లు తెలిపింది.

"ప్రస్తుత కరోనా విజృంభణ సమయంలో వైరస్​ వ్యాప్తి కట్టడి కోసం అంతర్గత సామర్థ్యాలను వినియోగించుకోవాలని ప్రభుత్వం భావిస్తోంది. తద్వారా ప్రజలకు ఉపశమనం ఇవ్వాలని యోచిస్తోంది. ఏ వైద్య విధానంలోనైనా.. అర్హత ఉన్న కేంద్ర ప్రభుత్వ ఉద్యోగులు.. మెడికల్​ ప్రాక్టీస్ లేదా టెలీ కన్​సల్టేషన్​ సేవలు అందించేందుకు సంబంధిత శాఖాధిపతుల అనుమతి తీసుకోవాల్సిన అవసరం లేదు."

-డీఓపీటీ

అర్హత కలిగిన ప్రభుత్వ ఉద్యోగులను వైద్య సేవల కోసం తీసుకోవచ్చని 57 ఏళ్ల క్రితం నాటి కేంద్ర హోం శాఖ ఉత్తర్వులను ప్రస్తావిస్తూ కేంద్రం ఈ తాజా ఉత్తర్వులు జారీ చేసింది. సంబంధిత ప్రభుత్వ ఉద్యోగి తమ అధికారిక విధులకు హాజరవుతూనే ఖాళీ సమయాల్లో ఈ సేవలను అందించాలని స్పష్టం చేసింది.

ఇదీ చూడండి:మరో టీకా రెడీ- జంతువు యాంటీబాడీలతో అభివృద్ధి!

ఇదీ చూడండి:కొవిడ్ అనంతర ఆరోగ్య సమస్యలను అధిగమించండిలా..!