Central teams to states: దేశంలో ఓ వైపు ఒమిక్రాన్ భయాలు, మరోవైపు కొత్త కేసుల పెరుగుదల నేపథ్యంలో కట్టడి చర్యలకు ఉపక్రమించింది కేంద్రం. వైరస్ ఉద్ధృతి అధికంగా ఉన్న 10 రాష్ట్రాల్లో కేంద్ర అత్యున్నత స్థాయి బృందాలను మోహరించనున్నట్లు శనివారం తెలిపింది కేంద్రం వైద్య, ఆరోగ్య శాఖ.
" ఒమిక్రాన్ కేసులు, కొవిడ్-19 కేసుల్లో భారీగా పెరుగదల లేదా వ్యాక్సినేషన్ నెమ్మదిగా నడుస్తోన్న గుర్తించిన 10 రాష్ట్రాలకు కేంద్ర ప్రత్యేక బృందాలను పంపాలని నిర్ణయించాం. ఆ రాష్ట్రాలు కేరళ, మహారాష్ట్ర, తమిళనాడు, బంగాల్, మిజోరాం, కర్ణాటక, బిహార్, ఉత్తర్ప్రదేశ్, ఝార్ఖండ్, పంజాబ్లు. ప్రత్యేక బృందాలు ఆయా రాష్ట్రాల్లో మూడు నుంచి ఐదు రోజుల పాటు పర్యటిస్తాయి. రాష్ట్ర ఆరోగ్య అధికారులతో కలిసి పనిచేస్తాయి. "
- కేంద్ర ఆరోగ్య శాఖ.
ప్రత్యేక బృందాలు ముఖ్యంగా.. కాంటాక్ట్ ట్రేసింగ్, నిఘా, కంటైన్మెంట్ కార్యక్రమాలు, కొవిడ్-19 పరీక్షలు, అవసరమైన నమూనాలను జినోమ్ సీక్వెన్సింగ్ కోసం ఇన్సాకాగ్కు పంపించటం వంటి అంశాలను పరిశీలించనున్నాయని కేంద్రం వెల్లడించింది. అలాగే.. కొవిడ్ జాగ్రత్తలు అమలు చేయటం, ఆసుపత్రుల్లో పడకల లభ్యత, అంబులెన్స్లు, వెంటిలేటర్లు, మెడికల్ ఆక్సిజన్తో పాటు రవాణా, వ్యాక్సినేషన్ పురోగతికి కూడా ఈ బృందాలు బాధ్యత వహిస్తాయి. 'రాష్ట్రస్థాయి కేంద్ర బృందాలు పరిస్థితులను అంచనా వేయటం, అవసరమైన చర్యలను సూచించటం, కేంద్ర, రాష్ట్ర ప్రభుత్వాలు చేపట్టిన ప్రజారోగ్య కార్యక్రమాలపై ప్రతి రోజు సాయంత్రం 7 గంటలకు నివేదిక సమర్పిస్తాయి.' అని ఆరోగ్య శాఖ పేర్కొంది.