Black fungus: ఔషధ ఉత్పత్తికి 5 సంస్థలకు అనుమతి!

కరోనాతో పాటు రోగులను వణికిస్తోన్న బ్లాక్ ఫంగస్​ చికిత్సలో వాడే ఆంఫోటెరిసిన్ బీ ఔషధ ఉత్పత్తి, సరఫరాను వేగవంతం చేసే దిశగా కేంద్రం చర్యలు చేపట్టింది. ఈ మేరకు ఔషధ ఉత్పత్తికి 5 సంస్థలకు అనుమతులిచ్చిన ప్రభుత్వం.. విదేశాల నుంచి పెద్ద ఎత్తున దానిని సేకరించాలని ఆదేశించింది. మరోవైపు ఆంఫోటెరిసిన్ బీ దిగుమతులపై ఇంపోర్టు డ్యూటీ చెల్లించాల్సిన అవసరం లేదని దిల్లీ హైకోర్టు పేర్కొంది.

బ్లాక్ ఫంగస్​ చికిత్స(Black fungus treatment)లో వాడే ఆంఫోటెరిసిన్ బీ ఔషధ ఉత్పత్తిని వేగవంతం చేసేందుకు మరో 5 కంపెనీలకు కేంద్ర ప్రభుత్వం లైసెన్సులు జారీ చేసినట్లు తెలుస్తోంది. ప్రపంచంలో ఈ ఔషధం ఎక్కడ అందుబాటులో ఉన్నా భారత్​కు అందుబాటులో ఉండే విధంగా చూసుకోవాలని ప్రధాని నరేంద్ర మోదీ అధికారులను ఆదేశించినట్లు విశ్వసనీయ వర్గాల సమాచారం. ఈ నేపథ్యంలో ప్రపంచవ్యాప్తంగా ఉన్న భారత కార్యాలయాలు ఆ పనిలో నిమగ్నమైనట్లు తెలుస్తోంది.

భారత్​కు 10లక్షల వయల్స్​..

మైలాన్ సంస్థ ద్వారా అమెరికాలోని గిలియడ్ సైన్సెస్.. భారత్​కు ఆంఫోటెరిసిన్ బీ (ఆంబీసోమ్) సరఫరాను వేగవంతం చేసేందుకు కృషి చేస్తున్నట్లు సమాచారం. ఇప్పటికే 1,21,000 ఆంబీసోమ్ వయల్స్ భారత్​ చేరగా, మరో 85 వేల వయల్స్​ మార్గం మధ్యంలో ఉన్నట్లు తెలుస్తోంది. మైలాన్ ద్వారా 10లక్షల ఆంఫోటెరిసిన్ వయల్స్​ను భారత్​కు సరఫరా చేయనుంది గిలియడ్ సైన్సెస్.

ఇంపోర్టు డ్యూటీ వద్దు..

ఆంఫోటెరిసిన్ బీ ఔషధాన్ని ఇంపోర్టు డ్యూటీ చెల్లించకుండానే దిగుమితి చేసుకునేందుకు దిల్లీ హైకోర్టు గురువారం అనుమతించింది. ఈ ఔషధం దిగుమతుల మీద కస్టమ్స్​ సుంకం రద్దుపై కేంద్రం నిర్ణయం తీసుకునేంతవరకు ఇంపోర్టు డ్యూటీ చెల్లించనవసరం లేదని స్పష్టం చేసింది. అయితే.. ఒక వేళ కేంద్రం కస్టమ్స్​ సుంకాన్ని రద్దు చేయకపోతే, దానిని దిగుమతిదారులే చెల్లిస్తామని హామీ ఇస్తూ ఓ బాండును సమర్పించాలని పేర్కొంది.

ఇదీ చూడండి:బ్లాక్, వైట్, ఎల్లో.. ఈ ఫంగస్​లేంటి? ఎవరికి ముప్పు?