al qaeda threat letter: మత ప్రభోదకుడిపై భాజపా నేతలు చేసిన వ్యాఖ్యలు ఇంటా, బయట రచ్చ లేపుతున్నాయి. ఇప్పటికే పలు ఇస్లామిక్ దేశాలు భారత్‌పై పలు ఆంక్షలు విధించాయి. ఈ వ్యాఖ్యలకు నిరసనగా భారత్‌పై ప్రతీకారం తీర్చుకుంటామని హెచ్చరిస్తూ ఆల్ఖైదా ఉగ్రసంస్థ లేఖ విడుదల చేయడం కలకలం రేపింది. దిల్లీ, ముంబయి, ఉత్తర్‌ప్రదేశ్‌, గుజరాత్‌ రాష్ట్రాల్లో ఆత్మాహుతి దాడులకు పాల్పడతామని హెచ్చరించింది. ఈ హెచ్చరికలను సీరియస్‌గా తీసుకున్న కేంద్ర దర్యాప్తు, నిఘా సంస్థలు ఆయా ప్రాంతాల్లో నిఘాను పటిష్ఠం చేశాయి. విమానాశ్రయాలు, మెట్రో, రైల్వే స్టేషన్లు, మార్కెట్లలో గస్తీని పెంచాయి. అనుమానాస్పదంగా ఎలాంటి చర్యలు గుర్తించినా.. సంబంధిత అధికారులకు వెంటనే నివేదించాలని సిబ్బందికి సూచించాయి.
అంతకుముందే.. వివాదాస్పద వ్యాఖ్యలు చేసినవారిపై ప్రతీకారం తీర్చుకుంటామని అంతర్జాతీయ ఉగ్రసంస్థ అల్ఖైదా ప్రకటించింది. భారత్‌లోని దిల్లీ, ముంబయి నగరాలతో పాటు, ఉత్తర్‌ప్రదేశ్‌, గుజరాత్‌ రాష్ట్రాలలో ఆత్మాహుతి దాడులకు పాల్పడతామని హెచ్చరించింది. అనుచిత వ్యాఖ్యలు చేసిన వ్యక్తులను సైతం హతమారుస్తామని 6వ తేదీతో వెలువడిన లేఖలో ఉగ్రసంస్థ పేర్కొంది. శరీరాలకు పేలుడు పదార్థాలను బిగించిన ఆత్మాహుతి దళాలను రంగంలోకి దించుతామంది. తమ పిల్లలను సైతం ఇందుకు వినియోగిస్తామని పేర్కొంది.