రిటైర్డ్​ ఉద్యోగి​ ఇంట్లో 17 కిలోల బంగారం.. సీబీఐ అధికారులు షాక్

విశ్రాంత ప్రభుత్వ ఉద్యోగి ఇంట్లో కిలోల కొద్దీ బంగారం దొరికింది. ఈ ఘటన ఒడిశాలోని భువనేశ్వర్​లో జరిగింది.

ఒడిశాలోని భువనేశ్వర్‌లో ఓ విశ్రాంత రైల్వే ఉద్యోగి ఇంటి నుంచి భారీగా బంగారం, నగదును సీబీఐ స్వాధీనం చేసుకుంది. మాజీ ప్రిన్సిపల్ చీఫ్​ కమర్షియల్​ మేనేజర్​ ప్రమోద్ జెనా నివాసంలో సోదాలు నిర్వహించగా.. 17 కిలోల బంగారంతో పాటు రూ.1.57 కోట్ల నగదు పట్టుబడినట్లు అధికారులు తెలిపారు.

అధికారులు స్వాధీనం చేసుకున్న బంగారం, వెండి

1989 బ్యాచ్​కి చెందిన ఇండియన్ రైల్వే ట్రాఫిక్ సర్వీస్ అధికారి ప్రమోద్ కుమార్ జెనా.. భారతీయ ఈస్ట్​ కోస్ట్​ రైల్వేలో చీఫ్ ఆపరేషన్​ మేనేజర్​గా పనిచేశారు. గత ఏడాది నవంబర్‌లో పదవీ విరమణ చేశారు. అయితే ఆదాయానికి మించి ఆస్తులు కూడబెట్టారన్న ఆరోపణలతో జనవరి 3న ఆయనపై కేసు నమోదైంది. భువనేశ్వర్​లోని ప్రమోద్ ఇంట్లో సెంట్రల్ బ్యూరో ఆఫ్ ఇన్వెస్టిగేషన్(సిబీఐ) మంగళవారం సోదాలు నిర్వహించింది. ఈ తనిఖీల్లో రూ. 1.57 కోట్లకు పైగా ధనం, రూ.8 నుంచి రూ.10 కోట్లు మధ్య విలువ చేసే 17 కిలోల బంగారు ఆభరణాలతో పాటు రూ.2.5 కోట్ల విలువైన బ్యాంకు, పోస్టల్ డిపాజిట్ల రసీదులను సీజ్​ చేసినట్లు అధికారులు తెలిపారు. పెద్ద సంఖ్యలో ఆస్తి పత్రాలు కూడా దొరికినట్లు వారు వెల్లడించారు.

అధికారులు స్వాధీనం చేసుకున్న బంగారం, ఆభరణాలు

'ప్రమోద్ కుమార్​కు శాలరీ, అద్దె మినహా ఎలాంటి ఆదాయ వనరు లేదు. భార్య రోసీనా జెనా.. గృహిణి. ఆమెకు ఎలాంటి ఆదాయం లేదు. కానీ ఆమె ప్రతి ఏడాది ఆదాయపు పన్ను రిటర్నులు దాఖలు చేస్తున్నారు. ప్రమోద్ కుమార్తెలు సైతం ఐటీఆర్​లు ఫైల్ చేస్తున్నారు. 2005లో ప్రమోద్​కు బ్యాంక్ బ్యాలెన్స్, ప్లాట్ల రూపంలో రూ.4.53 లక్షల విలువైన ఆస్తులు ఉన్నట్లు గుర్తించాం. 2020 మార్చి 31 నాటికి వీటి విలువ అమాంతం రూ.4.33 కోట్లకు పెరిగింది. వారి ఐటీ రిటర్నులలోని ప్రయోజనాలను మినహాయిస్తే.. 2005 నుంచి 2020 మధ్య వీరి ఆదాయం రూ.3.25 కోట్లు అని తేలింది. ఆదాయ, వ్యయాలను లెక్కించిన తర్వాత వీరి వద్ద రూ.1.92కోట్లు అదనంగా ఉన్నట్లు తేల్చాం. ఇది వారి సంపాదనతో పోలిస్తే 59.09 శాతం అధికం. ఒక్కో లాకర్ ఓపెన్ చేస్తున్నా కొద్దీ.. నల్లధనం బయటపడుతూనే ఉంది. ఇంకొన్ని లాకర్లు ఓపెన్ చేయాల్సి ఉంది' అని అధికారులు తెలిపారు.

అధికారులు స్వాధీనం చేసుకున్న నగదు, బంగారం

ఇవీ చదవండి: