C295 Military Transport Aircraft :భారత వైమానిక దళానికి చెందిన మొదటి C-295 రవాణా విమానం గుజరాత్ వడోదరాలోని ఎయిర్ ఫోర్స్ స్టేషన్‌లో బుధవారం ల్యాండ్ అయింది. బహ్రెయిన్ నుంచి టేకాఫ్ అయిన తర్వాత ఈ విమానాన్ని తొలిసారిగా గ్రూప్ కెప్టెన్ పీఎస్ నేగి నడిపారు. కాగా, దీనిని ఫ్రాన్స్కు చెందిన ఎయిర్బస్ డిఫెన్స్ అండ్ స్పేస్ సంస్థ ఈ తొలి C-295 ట్రాన్స్పోర్ట్ ఎయిర్క్రాఫ్ట్ను సెప్టెంబర్ 13న భారత్కు అందజేసింది. ఎయిర్బస్ ప్రొడక్షన్ ఫెసిలిటీ నుంచి వైమానిక దళపతి ఎయిర్ చీఫ్ మార్షల్ వీఆర్ చౌదరి ఈ విమానాన్ని అందుకున్నారు. అనంతరం అదే విమానంలో భారత్కు చేరుకున్నారు.
ఆ తేదీనే IAFలోకి ఎంట్రీ!
దేశ రాజధాని దిల్లీ సమీపంలోని హిందన్ ఎయిర్‌బేస్‌లో సెప్టెంబర్ 25న జరగనున్న కార్యక్రమంలో రక్షణ శాఖ మంత్రి రాజ్‌నాథ్ సింగ్ ఈ విమానాన్ని అధికారికంగా భారత వైమానిక దళంలోకి చేర్చనున్నారు. మొత్తం 56 విమానాలు IAFలోకి ప్రవేశించనున్నాయని.. వాటిల్లో 40 టాటా-ఎయిర్బస్ జాయింట్ వెంచర్ ద్వారా భారతదేశంలో తయారుచేసినవే అని IAF అధికారులు తెలిపారు.
దక్షిణ స్పెయిన్ నగరం సెవిల్లే నుంచి సెప్టెంబర్ 15న బయలుదేరిన ఈ విమానం ఈజిప్టు, మాల్టా, బెహ్రెయిన్లో ఆగి.. బుధవారం వడోదరాలోని ఎయిర్బేస్కు చేరుకుంది. కాగా, ఆర్డర్ చేసిన మొత్తం విమానాలు డెలివరీ అయితే.. ప్రపంచంలోనే భారత వైమానిక దళం అతిపెద్ద C-295 అపరేటర్ అవుతుందని భారత వాయుసేన ఓ ప్రకటనలో తెలిపింది.
"ఈ పరిణామం కేవలం దేశానికే కాదు భారత వాయుసేనకు ఒక కీలక మైలురాయి. వాయుసేనలోకి ఈ ఎయిర్క్రాఫ్ట్ల రాక.. వాయుసేన వ్యూహాత్మక ఎయిర్‌లిఫ్ట్ సామర్థ్యాలను మరింత మెరుగుపరుస్తుంది. అలాగే దేశంలో ఒక కొత్త శకానికి నాంది పలికింది."
-వీఆర్ చౌదరి, ఎయిర్ చీఫ్ మార్షల్
C295 Aircraft Specifications : అత్యవసర పరిస్థితులు నెలకొన్న సమయాల్లో సైనికులను సురక్షిత ప్రాంతాలకు తరలించడానికి ఈ C-295 విమానం ఉపయోగపడుతుంది. 5-10 టన్నుల సామర్థ్యం కలిగిన ఈ విమానం 71 ట్రూప్స్ను లేదా 50 మంది పారాట్రూపర్‌లను మోసుకెళ్లగలదు. పెద్ద పెద్ద విమానాలు వెళ్లలేని మారుమూల ప్రాంతాలకు కూడా ఈ సీ-295 ఎయిర్క్రాఫ్ట్ వెళ్లగలదు. మిలిటరీ లాజిస్టిక్స్ కోసం ఉపయోగించే ఉన్నతమైన విమానంగా ఈ సీ-295 ప్రసిద్ధి చెందింది. ఈ విమానాల్లో స్వదేశీ పరిజ్ఞానంతో తయారుచేసిన ఎలక్ట్రానిక్ వార్ ఫేర్ సూట్లను వినియోగించారు. ఇక వీటి తయారీలో దేశవ్యాప్తంగా ఉన్న ఎమ్ఎస్ఎమ్ఈలు కీలక పాత్ర పోషించనున్నాయి.
వాటి స్థానంలో..!
ఇండియన్ ఎయిర్ ఫోర్స్(IAF)ను ఆధునీకరించడమే లక్ష్యంగా రెండేళ్ల క్రితం భారత వైమానిక దళం, ఎయిర్బస్ మధ్య రూ.21,935 కోట్ల ఒప్పందం కుదిరింది. అందులో భాగంగా ఎయిర్బస్ 2025 చివరి నాటికి 'ఫ్లై-అవే' స్థితిలో మొదటి 16 విమానాలను అప్పగించనుంది. మరో 40 విమానాలను భారత్లో.. టాటా అడ్వాన్స్డ్ సిస్టమ్స్ తయారు చేసి.. అసెంబుల్ చేస్తుంది. వాయుసేనకు చెందిన అవ్రో విమానాల స్థానంలో ఈ C-295 విమానాలను భర్తీ చేయనున్నారు.
