Bypoll results:దేశవ్యాప్తంగా నాలుగు రాష్ట్రాల్లో ఈ నెల 12న జరిగిన ఉపఎన్నికల ఫలితాల్లో అక్కడి అధికార పార్టీల హవా కొనసాగింది. అందరి దృష్టిని ఆకర్షించిన పశ్చిమ బంగాల్లో అధికార తృణమూల్‌ కాంగ్రెస్‌ రెండు స్థానాల్లోనూ విజయం సాధించింది. అసాంసల్‌ లోక్‌సభ నియోజకవర్గంలో టీఎంసీ అభ్యర్థి శతృఘ్ను సిన్హా, తన సమీప భాజపా అభ్యర్ధి అగ్నిమిత్రాపై 3లక్షలకు పైగా మెజార్టీతో విజయం సాధించారు. బల్లిగంజ్ అసెంబ్లీ స్థానంలోనూ తృణమూల్‌ అభ్యర్థి బాబుల్ సుప్రియో 22వేల ఓట్ల ఆధిక్యంతో గెలుపొందారు.
బిహార్‌లోని బొచహాన్‌ అసెంబ్లీ నియోజకవర్గంలో రాష్ట్రీయ జనతా దళ్‌(RJD) అభ్యర్థి అమర్‌కుమార్‌ పాసవాన్‌, తన సమీప భాజపా అభ్యర్థి బేబీ కుమారిపై 35 వేల ఓట్ల ఆధిక్యంతో విజయం సాధించారు. మహారాష్ట్రలోని కొల్హాపూర్‌ నార్త్‌ అసెంబ్లీ స్థానంలో అధికార మహావికాస్‌ అఘాడి అభ్యర్థి జయశ్రీ జాదవ్‌, భాజపా అభ్యర్థి సత్యజీత్‌ కదమ్‌పై 18 వేల పైచిలుకు ఓట్ల తేడాతో గెలుపొందారు. ఛత్తీస్‌గఢ్‌లోని కైరాగర్‌ శాసనసభ స్థానంలో అధికార కాంగ్రెస్‌ అభ్యర్థి యశోదా వర్మ 20 వేల ఓట్ల ఆధిక్యంతో విజయం సాధించారు.