Brother And Sister Meets After 76 Years :దేశ విభజన సమయంలో విడిపోయిన అన్నాచెల్లెళ్లు 76 తర్వాత మళ్లీ కలుసుకున్నారు. వారిని ఏకం చేసిన ఘనత సోషల్ మీడియాకే దక్కింది. మహమ్మద్ ఇస్మాయిల్, ఆయనకు వరుసకు సోదరైన సురీందర్ కౌర్ సుదీర్ఘ కాలం తర్వాత కలుసుకున్నారు. ఈ క్రమంలో వారు తీవ్ర భావోద్వేగానికి గురయ్యారు.
ఏం జరిగిందంటే
భారత్-పాక్ విభజనకు ముందు మహమ్మద్ ఇస్మాయిల్, ఆయనకు వరుసకు సోదరైన సురీందర్ కౌర్ కుటుంబాలు జలందర్లోని షాకోట్ ప్రాంతంలో నివసించేవారు. ఇరు దేశాల మధ్య జరిగిన అల్లర్లు ఆ రెండు కుటుంబాల మధ్య దూరం పెంచాయి. దేశ విభజన తర్వాత మహమ్మద్ ఇస్మాయిల్.. పాకిస్థాన్.. పంజాబ్లోని సాహివాల్ జిల్లాలో నివాసం ఏర్పాటు చేసుకున్నారు. ఆయన ఉంటున్న ప్రాంతం లాహోర్కు 200 కి.మీ దూరంలో ఉంది. ఆయన సోదరి సురీందర్ కౌర్.. జలందర్లో నివాసం ఉంటున్నారు. దూరంగా ఉండటం వల్ల ఒకరి వివరాలు మరొకరికి తెలియలేదు. అప్పటినుంచి ఇరు కుటుంబాలు పరస్పరం దూరమయ్యాయి.
ఇద్దర్ని ఒక్కచోటకు చేర్చిన యూట్యూబ్ ఛానెల్
ఏడు దశాబ్దాలుగా విడిపోయిన ఇస్మాయిల్, ఆయన సోదరిని ఒక్క చోటుకు చేర్చిన ఘనత సోషల్ మీడియాకే దక్కుతుంది. మహమ్మద్ ఇస్మాయిల్, సురీందర్ కౌర్ల దీనగాథపై ఓ పాకిస్థానీ-పంజాబీ యూట్యూబ్ ఛానెల్ కథనం ప్రసారం చేసింది. అది చూసిన ఆస్ట్రేలియాకు చెందిన సర్ధార్ మిషన్ సింగ్ భారత్లో నివసిస్తున్న సురీందర్ కౌర్ గురించి సమాచారాన్ని మహమ్మద్ ఇస్మాయిల్కు అందించారు. ఆమె ఫోన్ నంబర్ను ఇస్మాయిల్కు ఇచ్చాడు. మిషన్ సింగ్ ఇచ్చిన ఫోన్ నంబర్ సహాయంతో ఇస్మాయిల్ తన సోదరి సురీందర్ కౌర్తో మాట్లాడారు. దీంతో ఏడు దశాబ్దాల తర్వాత మళ్లీ వారి అన్నాచెల్లెళ్ల బంధం చిగురించినట్లైంది. వారిద్దరూ కలుసుకునేందుకు మార్గం సుగమమైంది. కర్తార్పుర్ కారిడార్లో ఇరు కుటుంబాలు కలవాలని నిర్ణయించుకున్నారు.