మహారాష్ట్ర హోంమంత్రి అనిల్ దేశ్‌ముఖ్‌ అవినీతిపై విచారణ జరపాలంటూ పరంబీర్‌ వేసిన పిటిషన్పై తీర్పును బాంబే హైకోర్టు రిజర్వ్‌లో పెట్టింది. పరంబీర్‌ తరపున న్యాయవాదితో పాటు ప్రభుత్వం తరపున అడ్వకేట్‌ జనరల్‌ హైకోర్టులో తమ వాదనలు వినిపించారు. ఇరుపక్షాల వాదనలు విన్న చీఫ్‌ జస్టిస్‌ దీపాంకర్‌ దత్తా, జస్టిస్‌ జీఎస్‌ కులకర్ణీలతో కూడిన ధర్మాసనం తీర్పును రిజర్వ్ చేస్తున్నట్లు వెల్లడించింది.
నగరంలోని బార్లు, రెస్టారెంట్ల నుంచి నెలకు రూ.100కోట్ల వసూలు చేయాలంటూ పోలీసు అధికారులకు టార్గెట్‌ విధించడం సహా పోలీసు అధికారుల బదిలీల్లో హోంమంత్రి అధికార దుర్వినియోగానికి పాల్పడ్డారని పరంబీర్‌ తన పిటిషన్‌లో పేర్కొన్నారు. ఈ పిటిషన్ విచారణలో భాగంగా పరంబీర్‌ తరపు న్యాయవాదిని హైకోర్టు ధర్మాసనం పలు ప్రశ్నలు సంధించింది. హోంమంత్రిపై చేసిన ఆరోపణలపై ఎఫ్‌ఐఆర్‌ నమోదు చేయకుండా సీబీఐ దర్యాప్తునకు ఎలా ఆదేశించాలంటూ ప్రశ్నించింది. సీనియర్‌ పోలీసు అధికారి అయ్యి ఉండీ కూడా ఈ విషయం చెప్పాలా? అని ప్రశ్నించింది. అంతేకాకుండా ఎలాంటి ఫిర్యాదు లేకుండా రాష్ట్ర ప్రభుత్వ సర్వీసు విషయాల్లో ఎలా జోక్యం చేసుకోవాలని పరంబీర్‌ తరపు న్యాయవాది విక్రం నాంకనీని అడిగింది.