'శశికళను అన్నాడీఎంకేలోకి చేర్చుకునే ప్రసక్తే లేదు'

శశికళను కూటమిలో చేర్చుకునేది, లేనిది అన్నాడీఎంకే పార్టీనే నిర్ణయిస్తుందని తమిళనాడు భాజపా ఇంఛార్జ్​ సీటీ రవి పేర్కొన్నారు. ఈ వ్యాఖ్యలపై వెంటనే స్పందించిన అన్నాడీఎంకే.. శశికళను ఎట్టి పరిస్థితుల్లోనూ పార్టీలోకానీ, కూటమిలో కానీ చేర్చుకునేది లేదని స్పష్టం చేసింది.

అన్నాడీఎంకే నేతృత్వంలోని కూటమిలో శశికళను చేర్పించడానికి కేంద్ర హోంమంత్రి అమిత్​ షా.. సీఎం పళనిస్వామితో మాట్లాడుతున్నట్లు వచ్చిన వార్తలపై భాజపా తమిళనాడు ఇంఛార్జ్​ సీటీ రవి స్పందించారు. శశికళను కూటమిలో చేర్చుకోవడం అన్నాడీఎంకే నిర్ణయిస్తుందని, భాజపాకు సంబంధం లేదని అన్నారు. ఈ విషయంలో అమిత్ షా, పళనిస్వామితో మాట్లాడుతున్నట్లు వస్తున్నవి కేవలం వదంతులేనని స్పష్టం చేశారు. సీట్ల పంపకాలపై కూటమిలో గొడవలు లేవని చెప్పారు.

"శశికళ, అమ్మ మక్కల్​ మన్నేట్ర కజగం పార్టీ అధ్యక్షుడు టీటీవీ దినకరన్ బలాలు, బలహీనతలు పళనిస్వామికి, పనీర్​సెల్వంకు తెలుసు. అన్నాడీఎంకే కూటమిలోకి శశికళను, దినకరన్​​ను చేర్చుకునే విషయంపై వారే నిర్ణయం తీసుకుంటారు."

-సీటీ రవి, భాజపా తమిళనాడు ఇంఛార్జ్​

భాజపా వ్యాఖ్యలపై అన్నాడీఎంకే వెంటనే స్పందించింది. శశికళను తమ పార్టీలో గానీ, దినకరన్ పార్టీని తమ కూటమిలో కానీ ఎట్టి పరిస్థితుల్లోనూ చేర్చుకునేది లేదని స్పష్టం చేసింది.

శశికళను కూటమిలో చేర్చుకోవాలని భాజపా నుంచి ఒత్తిడి వస్తున్నట్లు వినిపిస్తున్న వార్తలను అన్నాడీఎంకే సీనియర్​ నేత, మంత్రి డీ జయకుమార్​ కొట్టిపారేశారు. కూటమిలో శశికళను చేర్చుకోవడం జరగదని అన్నారు. ఆమెను చేర్చుకోవాలని తమను ఎవరూ ఒత్తిడి చేయట్లేదని స్పష్టం చేశారు.

ఇదీ చూడండి:ఎన్నికల వేళ.. శశికళ సంధి ప్రతిపాదన