పతనం అంచుల నుంచి విజయతీరాలకు.. మణిపుర్​లో భాజపా మేజిక్!

BJP in Manipur: మణిపుర్​లో మరోసారి కాషాయ జెండా రెపరెపలాడింది. భాజపా వరుసగా రెండోసారి అధికార పీఠాన్ని కైవసం చేసుకుంది. గత ఎన్నికల్లో ఇతర ప్రాంతీయ పార్టీల మద్దతుతో ప్రభుత్వాన్ని ఏర్పాటు చేసిన కమలం పార్టీ.. ఈసారి అన్ని స్థానాల్లో(60) ఒంటరిగానే పోటీ చేసి విజయం సాధించింది. ఈ ఎన్నికల్లో పార్టీ విజయానికి కారణాలేంటో ఇప్పుడు చూద్దాం..

Manipur Election Results: ఈశాన్య రాష్ట్రం మణిపుర్​లో భాజపా అతిపెద్ద పార్టీగా అవతరించింది. 2017 ఎన్నికల్లో 21 సీట్లే గెలిచినప్పటికీ ఇతర ప్రాంతీయ ప్రాంతాలతో కలిసి ప్రభుత్వాన్ని ఏర్పాటు చేసిన ఆ పార్టీ.. ఈసారి మొత్తం 60 స్థానాల్లో ఒంటరిగా పోటీ చేసి 32 స్థానాలను కైవసం చేసుకుంది. దీంతో బీరెన్ సింగ్​ మరోసారి ముఖ్యమంత్రి బాధ్యతలు చేపట్టనున్నారు. అయితే 2020లో భాజపా తిరుగబాటుదారులు బీరెన్ సింగ్​ ప్రభుత్వాన్ని కూల్చినంత పనిచేశారు. కాంగ్రెస్​, ఎన్​పీపీ నాయకులతో కలిసి ఆయన్ను ఇరకాటంలో పెట్టాలనుకున్నారు. కానీ జాతీయ నాయకత్వం అండతో బీరెన్​ సింగ్ అధికారాన్ని నిలబెట్టుకున్నారు. ఈసారి మరోమారు సీఎం పగ్గాలు చేపట్టనున్నారు.

Manipur Results

అమిత్​ షా అండ..

సొంత పార్టీ నేతల నుంచి వ్యతిరేకత వచ్చినప్పటికీ బీరెన్​ సింగ్​కు భాజపా అగ్రనేత, కేంద్ర హోంమంత్రి అమిత్​ షా​ అండగా నిలిచారు. బీరెన్ నాయకత్వంలో భాజపా ఎన్నికలకు వెళ్తున్నట్లు ఇంపాల్​లో జరిగిన ర్యాలీలో ప్రకటించారు. దీంతో ఆయనకు విశ్వాసం పెరిగింది.

అయితే 2017 ఎన్నికల అనంతరం నాగా పీపుల్స్ ఫ్రంట్​(ఎన్​పీఎఫ్​), నేషనల్ పీపుల్స్ పార్టీ(ఎన్​పీపీ), జనతాదళ్ యునైటెడ్​(జేడీయూ)తో కలిసి సంకీర్ణ ప్రభుత్వాన్ని ఏర్పాటు చేసిన భాజపా.. 2022లో ఎన్నికల్లో మాత్రం ఒంటరిగానే బరిలోకి దిగింది. గత ఎన్నికల్లో 28 స్థానాలు గెలిచి తృటిలో అధికారాన్ని కోల్పోయిన కాంగ్రెస్​ ఈసారి వామపక్ష పార్టీలు సహా ఇతర ప్రాంతీయ పార్టీలతో కలిసి కూటమిగా పోటీ చేసింది.

కాంగ్రెస్​ నుంచి వచ్చిన వారికే టికెట్లు..

ఈ ఎన్నికల్లో కాంగ్రెస్​ నుంచి భాజపాలోకి వలస వచ్చిన వారికే ప్రాధాన్యం ఇచ్చింది పార్టీ. వీరిలో కొంతౌజామ్​ గొవిందాస్​, మూడు సార్లు కాంగ్రెస్​ సీఎంగా ఉన్న ఇబోబి సింగ్​ బంధువు ఒక్రామ్​ హెన్రీ, సీఎం బీరెన్​ సింగ్​ అల్లుడు రాజ్​కమార్ ఇమో సింగ్​ వంటి ప్రముఖులు ఉన్నారు. తమ సీనియర్ నేతలను కాదని మరీ కాంగ్రెస్​ నుంచి వచ్చిన వారికే అవకాశం ఇచ్చింది కమలం పార్టీ.

BJP Manipur News

తౌబాల్​లో విస్తృత ప్రచారం..

కాంగ్రెస్​ దిగ్గజనేత, మాజీ సీఎం ఇబోబి సింగ్ కంచుకోటగా ఉన్న తౌబాల్ జిల్లాలో ఈసారి విస్తృత ప్రచారం నిర్వహించింది భాజపా. 6 నియోజకవర్గాలు ఉన్న ఈ జిల్లాలో ప్రధాని నరేంద్ర మోదీ, హోంమంత్రి అమిత్​షాతో భారీ ర్యాలీలు నిర్వహించింది. ఫలితంగా ఈ పర్వతప్రాంతం చుట్టుపక్కల జిల్లాలోని ఓటర్లను కూడా ప్రభావితం చేసింది.

నాగాలు అధికంగా ఉండే కొండ ప్రాంతాల్లోని 11 నియోజకవర్గాలపైనా ఈసారి ప్రత్యేకంగా దృష్టి సారించింది భాజపా. ఈ ప్రాంతంలోని ఓటర్లు కాంగ్రెస్​ లేదా ఎన్​పీఎఫ్​కు ఓట్లు వేయడం ఆనవాయితీగా వస్తోంది.

అలాగే కుకీ ప్రాబల్యం ఉన్న చురచంద్‌పూర్ జిల్లాలో కార్యకలాపాల నిషేధాజ్ఞలు అమల్లో ఉన్న సాయుధ గ్రూప్​ల​ మద్దతు కూడా తమకే ఉందని భాజపా చెప్పింది. అంతకుముందు వీరు కాంగ్రెస్​ వైపు ఉండేవారు.

Manipur Assembly Poll Results

కేంద్రం మద్దతు తప్పనిసరి..

ఈశాన్య రాష్ట్రాల్లో అభివృద్ధి జరగాలంటే కేంద్రం నిధులే కీలకం. అందుకే కేంద్రంలో అధికారంలో ఉన్న పార్టీలే ఇక్కడ ప్రభుత్వాన్ని ఏర్పాటు చేస్తున్నాయి. ఎన్డీఏ సర్కార్​ కూడా ఈశాన్య రాష్ట్రాల అభివృద్ధికి తాము కట్టుబడి ఉన్నామని పదేపదే చెబుతోంది. పలు అభివృద్ధి కార్యక్రమాలు కూడా చేపట్టింది. అందుకే ప్రజలు ఆ పార్టీవైపే మొగ్గు చూపారు. మణిపుర్​లో 2017కు ముందు కాంగ్రెస్​ వరుసగా మూడు సార్లు అధికారంలో ఉంది.

ఇదీ చదవండి:ఆప్​ అభ్యర్థి చేతిలో అమరీందర్​ సింగ్​ ఓటమి