బైక్​ ఇంజిన్​తో జీప్.. గంటకు 70కి.మీ స్పీడ్​.. మైలేజ్ ఎంతంటే..?

Bike Engine From jeep Bihar: లక్షన్నర రూపాయల బడ్జెట్.. నలుగురు దర్జాగా కూర్చుని ప్రయాణించే వీలు.. లీటరు పెట్రోల్​కు 30 కి.మీ మైలేజ్.. వింటుంటూనే ఔరా అనిపించేలా ఉన్న ఇలాంటి స్పెసిఫికేషన్స్​తో మినీ జీప్​ తయారు చేశాడు ఓ సాధారణ మెకానిక్. ఎవరతడు? ఏంటా వాహనం ప్రత్యేకత?

Bike Engine From jeep Bihar: బిహార్‌లోని బేతియాలో లోహా సింగ్ అనే మెకానిక్ బైక్ ఇంజిన్‌తో నాలుగు సీట్ల మినీ క్లాసిక్ జీప్‌ను తయారు చేశాడు. 150 సీసీ ఇంజిన్ ఉన్న ఈ జీప్​లో నలుగురు కూర్చోవచ్చు. ఒక లీటర్ పెట్రోల్‌తో 30 కిలోమీటర్లు ప్రయాణించవచ్చు. 10 క్వింటాళ్ల బరువు గల సరకులను తీసుకెళ్లవచ్చు.

లోహా సింగ్ తయారు చేసిన వాహనం

లాక్​డౌన్​ సమయంలో ఏదైనా కొత్తగా చేయాలని ఆలోచించాడు లోహా సింగ్. యూట్యూబ్​లో వీడియోలు చూస్తున్నప్పుడు క్లాసిక్ జీప్ తయారు చేయాలనే ఆలోచన అతడికి వచ్చింది. ఈ వాహనాన్ని ఇరుకైన వీధుల్లోనూ నడపగలిగేలా నిర్మించాడు. యూట్యూబ్​ సహాయంతో నాలుగు సీట్ల మినీ క్లాసిక్ జీప్‌ను రూపొందించడానికి లోహా సింగ్​కు 50 రోజులు పట్టింది.

150 సీసీ బైక్​ ఇంజిన్​తో జీపు తయారీ చేసిన మెకానిక్

"లాక్​డౌన్ సమయంలో ఏ పని లేకుండాఖాళీగా ఉన్నాను. అప్పుడే ఏదైనా కొత్తగా చేయాలనే ఆలోచన వచ్చింది. సెకండ్​ హ్యాండ్ సీబీజీ​ బైక్ తీసుకొచ్చాం. దాని​ ఇంజిన్​ను వేరు చేశాం. ఆ తరువాత టెంపో భాగాలను తీసుకొచ్చాం. అన్నింటినీ కలిపి ఈ క్లాసిక్ జీప్ తయారుచేశాను. ఈ జీప్ లీటర్ పెట్రోల్​కు 30 కి.మీ మైలేజ్​ ఇస్తుంది."

-లోహా సింగ్, మినీ జీప్ రూపకర్త

ఈ జీప్​కు మొత్తం 6 గేర్లు ఉన్నాయని.. సెల్ఫ్ స్టార్ట్ చేసుకోవచ్చని లోహా సింగ్ చెబుతున్నాడు. క్లాసిక్ జీప్‌లోని పవర్ టిల్లర్ చక్రాలు.. నీటితో నిండిన రోడ్లపైనా సాఫీగా దూసుకుపోగలవని అంటున్నాడు. ఈ మినీ క్లాసిక్ జీప్​లో గంటకు 60 నుంచి 70 కిలోమీటర్ల వేగంతో ప్రయాణించవచ్చని చెబుతున్నాడు. జీప్ తయారీకి రూ.1.5 లక్షలు ఖర్చయిందని వెల్లడించాడు.

బైక్​ ఇంజిన్​తో తయారు చేసిన జీపు

మార్కెట్​లో మినీ క్లాసిక్ జీప్​లకు మంచి డిమాండ్ ఉందని, అందుకే ఇలాంటివి మరిన్ని తయారు చేసి అమ్మాలనే ఆలోచన ఉందని చెబుతున్నాడు లోహా సింగ్. చాలా మంది కస్టమర్​లు తాను తయారు చేసిన జీప్​ను కొనాలనుకుంటున్నారని వెల్లడించాడు. అయితే ఇది తాను రూపొందించిన మొదట జీప్​ అని.. అందుకే ఎవరికీ అమ్మడం లేదని చెప్పాడు లోహా సింగ్.

ఇవీ చదవండి:సూపర్​ హెయిర్​ స్టైలిస్ట్​.. ఒకేసారి 28 కత్తెర్లతో కటింగ్