Bihar Train Accident : పట్టాలు తప్పిన 6బోగీలు.. నలుగురు మృతి.. 70 మందికి గాయాలు

Bihar Train Accident : బిహార్​లో నార్త్​ఈస్ట్​​ సూపర్​ఫాస్ట్​ ఎక్స్​ప్రెస్​ ఆరు బోగీలు పట్టాలు తప్పాయి. ఈ ఘటనలో నలుగురు మృతిచెందగా.. మరో 70 మంది దాకా గాయపడ్డారు. సమాచారం అందుకున్న రైల్వే అధికారులు.. ఘటనాస్థలికి చేరుకుని సహాయక చర్యలు చేపట్టారు.

Bihar Train Accident :బిహార్​లోని బక్సర్​ జిల్లాలో నార్త్​ఈస్ట్​​ సూపర్​ఫాస్ట్​ ఎక్స్​ప్రెస్​(రైలు నెం-12506) పట్టాలు తప్పింది. రఘనాథ్​పుర్​ రైల్వే స్టేషన్​లో సమీపంలో బుధవారం రాత్రి 9.53 గంటల సమయంలో జరిగిన ఈ ఘటనలో ఆరు బోగీలుపట్టాలు తప్పాయి. ప్రమాదంలో ఆరుగురు ప్రాణాలు కోల్పోగా.. మరో 70 మందికి గాయాలయ్యాయి. ప్రమాదంపై సమాచారం అందుకున్న రైల్వే అధికారులు.. ఘటనాస్థలికి చేరుకుని సహాయక చర్యలు చేపట్టారు. ఈ ఘటనపై విచారం వ్యక్తం చేసిన బిహార్​ ముఖ్యమంత్రి నీతీశ్​ కుమార్.. మృతుల కుటుంబాలకు రూ.4 లక్షల ఎక్స్​గ్రేషియా ప్రకటించారు.

ఇదీ జరిగింది..
North East Express Accident :నార్త్​ఈస్ట్​ సూపర్​ ఫాస్ట్​ ఎక్స్​ప్రెస్ 23 కోచ్​లతో దిల్లీ నుంచి గువాహటి సమీపంలోని కామాఖ్యకు ఉదయం 7.40 గంటల సమయంలో బయలుదేరింది. రైలు రఘనాథ్​పుర్​ రైల్వే స్టేషన్​లో సమీపంలోకి రాగానే ఆరు బోగీలు అకస్మాత్తుగా పట్టాలు తప్పాయి. ఈ ఘటనలో రెండు ఏసీ 3 టైర్​ కోచ్​లు తీవ్రంగా ధ్వంసమయ్యాయి. మరో నాలుగు బోగీలు బోల్తా పడినట్లు అధికారులు తెలిపారు. గాయపడ్డవారిని స్థానిక ఆస్పత్రులకు తరలించామని.. తీవ్ర గాయాలైన వారిని పట్నాలోని ఎయిమ్స్​కు తీసుకెళ్లామని చెప్పారు. ఈ ఘటనపై స్పందించిన రైల్వే శాఖ మంత్రి.. ప్రమాదానికి కారణాలను త్వరలో కనుగొంటామని చెప్పారు. మృతుల కుటుంబాలకు సంతాపం తెలిపారు.

"రైలు సాధారణ వేగంతో వస్తోంది. కానీ అకస్మాత్తుగా మాకు పెద్ద శబ్దం వినిపించింది. రైలు నుంచి పొగలు వచ్చాయి. ఏం జరిగిందో చూడటానికి మేము అక్కడికి పరిగెత్తాము. అక్కడికి వెళ్లి చూసేసరికి రైలు పట్టాలు తప్పింది. AC కోచ్‌లు ఎక్కువగా దెబ్బతిన్నాయి."
--హరి పతాక్, స్థానికుడు

North East Express Derails In Bihar :పట్టాలు తప్పిన రైలులోని ప్రయాణికులను వారి గమ్యస్థానాలకు చేర్చేందుకు ప్రత్యామ్నాయ ఏర్పాట్లు చేశామని అధికారులు తెలిపారు. అందు కోసం ఓ రైలుతో పాటు ఆరు బస్సులను కూడా స్టేషన్​కు పంపినట్లు చెప్పారు. బక్సర్​లోని ఆస్పత్రులను కూడా అలర్ట్​ చేసినట్లు వెల్లడించారు. దీంతో పాటు ప్రయాణికుల కోసం అత్యవసర హెల్ప్​లైన్​ నంబర్​లను కూడా జారీ చేశామని చెప్పారు.

అయితే రైలు బక్సర్​ స్టేషన్ నుంచి బయలుదేరిన అరగంటకే ప్రమాదానికి గురైందని ఈస్ట్​ సెంట్రల్ రైల్వే చీఫ్​ పబ్లిక్ రిలేషన్స్ అధికారి బీరేంద్ర కుమార్​ తెలిపారు. ఈ ఘటనపై బిహార్ ఉపముఖ్యమంత్రి తేజస్వి యాదవ్ స్పందించారు. బాధితులకు వీలైనంత త్వరగా సహాయం అందేలా తక్షణ చర్యలు చేపట్టాలని విపత్తు నిర్వహణ, ఆరోగ్య శాఖలను కోరినట్లు చెప్పారు. అయితే ఈ ప్రమాదం కారణంగా దిల్లీ-దిబ్రుగఢ్​ మధ్య రాజధాని ఎక్స్​ప్రెస్​తో సహా దాదాపు 18 రైళ్లను దారి మళ్లించారు.