'అందరికీ టీకా.. 2021లోనే అతిపెద్ద సవాల్​'

ప్రపంచ దేశాలకు వ్యాక్సిన్​ అందించడం కష్టంతో కూడుకున్న పని అని ప్రపంచ ఆరోగ్య సంస్థ అసిస్టెంట్​ డైరెక్టర్​ జనరల్​ డాక్టర్​పీటర్​ సింగర్​ అభిప్రాయపడ్డారు. ఈ ఏడాది తమకు ఇదే అతిపెద్ద సవాల్​ అని కేరళ ఆరోగ్య శాఖ నిర్వహించిన ఓ కార్యక్రమంలో ఆయన చెప్పారు.

అన్ని దేశాల ప్రజలు వ్యాక్సిన్​ పొందేలా చూడటమే 2021లో అతిపెద్ద సవాల్​ అని ప్రపంచ ఆరోగ్య సంస్థ(డబ్ల్యూహెచ్​ఓ) అసిస్టెంట్​ డైరెక్టర్​ జనరల్​ డాక్టర్​ పీటర్​ సింగర్​ అన్నారు. ప్రస్తుతం.. ధనిక దేశాలకే టీకా అందుబాటులో ఉందని డబ్ల్యూహెచ్ఓ డైరెక్టర్​ డాక్టర్​ టెడ్రోస్​ అథనోమ్​ అభిప్రాయపడిన నేపథ్యంలో ఈ విధంగా స్పందించారు సింగర్​.

కేరళ ప్రభుత్వ ఆరోగ్య, కుటుంబ సంక్షేమ శాఖ నిర్వహించిన 'కేరళ హెల్త్​: మేకింగ్​ ద ఎస్డీజీ ఎ రియాలిటీ' అంతర్జాతీయ సమావేశానికి వర్చువల్​గా హాజరయ్యారు సింగర్​. ఈ సందర్భంగా ప్రసంగించిన ఆయన.. ప్రస్తుతం మహమ్మారిని జయించడమే ప్రధాన లక్ష్యమని చెప్పారు. ఆపై.. ఐక్యరాజ్యసమితి ఇతర లక్ష్యాలైన పేదరికం, ఆకలి, నిరక్షరాస్యత, లింగ అసమానతతో సహా.. వాయు కాలుష్యం వంటి వాటిని అధిగమించేందుకు కృషి చేస్తున్నట్టు తెలిపారు.

కొవిడ్​-19 వ్యాప్తిని అరికట్టడంలో కీలకపాత్ర పోషించిన కేరళ, భారత్​లను సింగర్​ ప్రశంసించారు. 2020 ఏడాది అందరికీ అత్యంత కఠిన పరీక్ష అని ఆయన​ అన్నారు. దేశంలో యాక్టివ్​ కేసుల సంఖ్య కంటే రికవరీలే అధికంగా ఉండటం ఊరట కలిగిస్తోందన్న ఆయన.. మహమ్మారి తగ్గుముఖం పట్టిందనడానికి ఈ లెక్కలే నిదర్శనం అని పేర్కొన్నారు. అలాగే దేశవ్యాప్తంగా టీకా సరఫరా కూడా గణనీయంగా ఊపందుకుందని ఆయన చెప్పారు.

ఇదీ చదవండి:దేశంలో మరో 12,881 కేసులు.. 101 మరణాలు