దళిత హక్కుల పోరాట సమితి భీమ్ ఆర్మీ చీఫ్, ఆజాద్ సమాజ్ పార్టీ జాతీయ అధ్యక్షుడు చంద్రశేఖర్ ఆజాద్పై దుండగులు కాల్పులు జరిపారు. గుర్తు తెలియని వ్యక్తులు ఆయన కాన్వాయ్పై దాడికి పాల్పడ్డారు. ఉత్తర్ప్రదేశ్ సహరాన్పుర్లో తన మద్దతుదారుడి నివాసంలో జరిగిన ఓ కార్యక్రమంలో పాల్గొని తిరిగి వస్తుండగా ఆజాద్పై కాల్పులు జరిగినట్లు తెలుస్తోంది. ఈ ఘటనలో ఆయనకు తూటా తగిలింది. దీంతో చికిత్స నిమిత్తం వెంటనే ఆస్పత్రికి తరలించారు. ప్రస్తుతం ఆయన పరిస్థితి బాగానే ఉందని పోలీసు అధికారి విపిన్ టాడా తెలిపారు.
"చంద్రశేఖర్ ఆజాద్ కాన్వాయ్పై దాడి జరిగింది. కొందరు కారులో వెళ్తూ ఆయన కాన్వాయ్పై కాల్పులు జరిపారు. ఆజాద్ పొత్తికడుపులోకి తూటా దూసుకెళ్లింది. ప్రస్తుతం ఆజాద్ ఆరోగ్య పరిస్థితి బాగానే ఉంది. ఆయనను చికిత్స నిమిత్తం సీహెచ్సీ ఆస్పత్రికి తరలించాం. కాల్పుల ఘటనపై పోలీసులు దర్యాప్తు చేస్తున్నారు."
-విపిన్ టాడా, పోలీసు అధికారి
కాల్పుల తర్వాత పరార్..
కాల్పులు జరిగిన సమయంలో చంద్రశేఖర్ ఆజాద్.. టయోటా ఫార్చునర్ కారులో ప్రయాణిస్తున్నారు. కాల్పులు జరిపిన వ్యక్తులు హరియాణా లైసెన్స్ నెంబర్ ప్లేట్ కలిగిన కారులో వచ్చినట్లు పోలీసులు గుర్తించారు. ఆజాద్ కాన్వాయ్కు దగ్గరికి దూసుకొచ్చి పలు రౌండ్ల కాల్పులు జరిపినట్లు తెలుస్తోంది. ఆజాద్ కారులోని సీటు, డోర్కు బుల్లెట్ తగిలినట్లు పోలీసులు తెలిపారు. కాల్పులు జరిపిన వెంటనే దుండగులు అక్కడి నుంచి పరార్ అయ్యారని పోలీసులు వెల్లడించారు.
సమాజ్వాదీ ఫైర్
దాడి నేపథ్యంలో చంద్రశేఖర్ ఆజాద్ అనుచరులు, మద్దతుదారులు ఆందోళనకు దిగారు. ఆజాద్ చికిత్స పొందుతున్న ఆస్పత్రికి పెద్ద సంఖ్యలో తరలివచ్చారు. తమ నాయకుడికి సరైన భద్రత కల్పించలేదని ఆరోపిస్తున్నారు. ఈ నేపథ్యంలో ఆస్పత్రి వద్ద భారీగా పోలీసులను మోహరించారు. ఈ ఘటనపై ఉత్తర్ప్రదేశ్లోని విపక్ష సమాజ్వాదీ పార్టీ తీవ్రంగా స్పందించింది. ప్రజాప్రతినిధులకే రక్షణ లేకపోతే రాష్ట్రంలో సాధారణ ప్రజల పరిస్థితి ఏమవుతుందని ఆ పార్టీ అధినేత అఖిలేశ్ యాదవ్ ప్రశ్నించారు. ఉత్తర్ప్రదేశ్లో ఆటవిక పాలన నడుస్తోందని ట్వీట్ చేశారు. ఎస్పీ సీనియర్ నేత శివపాల్ యాదవ్ సైతం ఈ ఘటనను ఖండించారు. రాష్ట్రంలో నేరస్థులు రెచ్చిపోతున్నారని.. విపక్ష నేతలకు రక్షణ లేకుండా పోయిందని మండిపడ్డారు.
