పేదలకు అండగా ట్రాన్స్​జెండర్​- ఏడాదికి 10మంది యువతులకు పెళ్లిళ్లు- గత 12 ఏళ్లుగా ఇలానే!

Bharatpur Transgender Neetu : పేద కుటుంబాలకు చెందిన అమ్మాయిలకు వివాహం చేయడానికి వారి తల్లిదండ్రులు పడే ఇబ్బందులు అన్నిఇన్ని కావు. అలాంటి వారి బాధను అర్థం చేసుకున్నారు రాజస్థాన్​కు చెందిన ఓ ట్రాన్స్​జెండర్. దీంతో ప్రతీ ఏటా 10 మంది పేద అమ్మాయిలకు వివాహం చేస్తున్నారు.

Bharatpur Transgender Neetu :ప్రతీ ఏటా పది మంది పేద కుటుంబాలకు చెందిన అమ్మాయిలకు వివాహాలు చేస్తూ గొప్ప మనసు చాటుకుంటున్నారు ఓ ట్రాన్స్​జెండర్. గత 12 ఏళ్ల నుంచి ఇప్పటివరకూ 120 మంది అమ్మాయిలకు పెళ్లిళ్లు చేశారు ట్రాన్స్​జెండర్​. ఈ ఏడాది కూడా ఓ పదిమంది అమ్మాయిలకు వివాహాలను చేశారు. ఆమే రాజస్థాన్​కు చెందిన నీతూ. ఆ​ ప్రాంత ప్రజలు నీతూ ఆంటీ అని ఆమెను ముద్దుగా పిలుచుకుంటారు. నీతూ స్వస్థలం భరత్​పుర్​.

పన్నెండేళ్ల క్రితం అందరి ట్రాన్స్​జెండర్​ల మాదిరిగానే నీతూ కూడా ప్రజల ఇళ్లకు వెళ్లి వారిని దీవించేవారు. ఈ క్రమంలోనే పేద కుటుంబాలకు చెందిన అమ్మాయిలకు పెళ్లిళ్లు చేయడానికి వారి తల్లిదండ్రులు పడే ఇబ్బందులను నీతూ కళ్లారా చూశారు. అలాంటి వారికోసం ఏదైనా మంచి పనిచేయాలనుకున్నారు. ఈ క్రమంలో కొందరు యువతులకు వివాహాలు చేశారు. ఆ తర్వాత ప్రతి ఏటా ఓ పదిమంది హిందూ-ముస్లిం అమ్మాయిలకు పెళ్లిళ్లు చేయాలని నిర్ణయించుకున్నారు. ఈ విధంగా గత పన్నెండేళ్లుగా పేద యువతులకు వివాహాలు చేస్తున్నారు నీతూ.

"కన్యాదానానికి మించిన గొప్పదానం లేదు. పేద కుటుంబాలకు చెందిన అమ్మాయిలకు వివాహాలు చేయడం వల్ల నాకు చాలా సంతృప్తి కలుగుతుంది. భవిష్యత్​లో మరింత మంది పేద పిల్లలకు పెళ్లిళ్లు చేయాలనుకుంటున్నాను. "
-నీతూ, ట్రాన్స్ ​జెండర్.

నీతూ నిర్వహించే ఈ సామూహిక వివాహాల్లో కళ్యాణమండపంలో వేదమంత్రాలు, నిఖా శబ్దాలు వినిపిస్తాయి. సోమవారం పాయ్​బాగ్​లో ఉన్న కళ్యాణ మండపంలో 10 మంది అమ్మాయిలకు పెళ్లిళ్లు చేశారూ నీతూ. ఒకే వేదికపై జరిగిన ఈ వివాహ వేడుక ఘనంగా జరిపించారు. కన్యాదానానికి కావాల్సిన బంగారం, వెండి ఇతర వస్తువులనూ నీతూనే సమకూర్చారు. ​ఈ విధంగా ఎన్నో పేద కుటుంబాలకు చెందిన అమ్మాయిలకు వివాహం చేసి వారి జీవితాల్లో వెలుగులు నింపారు.

కొద్ది రోజుల క్రితం.. పంజాబ్​ అమృత్​సర్లో ఓ వింత ప్రేమ కథ వెలుగులోకి వచ్చింది. ఒక యువకుడు, ట్రాన్స్​జెండర్​ ఇద్దరూ ఒకరినొకరు ప్రేమించుకున్నారు. అనంతరం పెళ్లి చేసుకుని జీవితాంతం కలిసి జీవించాలనుకున్నారు. అందుకోసం ఆపరేషన్​ చేయించుకుని అమ్మాయిగా మారాడు.. మొత్తం స్టోరీ కోసం ఈ లింక్​పై క్లిక్ చేయండి.