'ఏడు నెలల్లో జైడస్ కాడిలా కరోనా వ్యాక్సిన్!'

కరోనా నియంత్రణకు తయారు చేసిన జైకొవ్-డీ వ్యాక్సిన్​ను మరో ఏడు నెలల్లో విడుదల చేసేందుకు ప్రయత్నిస్తున్నట్లు జైడస్ కాడిలా సంస్థ ప్రకటించింది. వచ్చే మూడు నెలల్లో మనుషులపై ప్రయోగాలు పూర్తి చేయనున్నట్లు తెలిపింది.

కొవిడ్-19 వ్యాక్సిన్ తయారీలో భారత సంస్థలు దూసుకెళ్తున్నాయి. ఇప్పటికే మనుషులపై క్లినికల్ ట్రయల్స్ ప్రారంభించిన జైడస్ కాడిలా సంస్థ... త్వరలోనే వ్యాక్సిన్​ విడుదల చేసేందుకు సన్నాహాలు చేస్తోంది. సంస్థ తయారు చేసిన వ్యాక్సిన్​ క్యాండిడేట్​ జైకొవ్-డీ క్లినికల్ ట్రయల్స్​ను ​మరో 7 నెలల్లో పూర్తి చేయనున్నట్లు జైడస్ కాడిలా ఛైర్మన్ పంకజ్ ఆర్ పటేల్ పేర్కొన్నారు.

"వ్యాక్సిన్​ క్యాండిడేట్​ జైకొవ్​-డీ.. ఫేజ్​ 1, ఫేజ్​ 2 క్లినికల్​ ట్రయల్స్​ను వచ్చే మూడు నెలల్లో పూర్తి చేసి, ఫలితాలను నియంత్రణ సంస్థకు పంపించనున్నాం. ఫలితాల ఆధారంగా టీకా ప్రభావవంతమని తేలితే విడుదల చేసేందుకు ఏడు నెలలు పడుతుంది. భారతీయ మార్కెట్​ అవసరాలు తీర్చడమే మా తొలి లక్ష్యం."

-పంకజ్​ ఆర్​ పటేల్, జైడస్ కాడిలా ఛైర్మన్

వివిధ ప్రాంతాల్లో ఉన్న ఫార్మా కంపెనీలతో భాగస్వామ్యం కుదుర్చుకునేందుకు సంస్థ సిద్ధమవుతోందని పంకజ్ పేర్కొన్నారు. అయితే ఇప్పుడే వీటి గురించి ఆలోచించడం తొందరపాటే అవుతుందని అన్నారు.

మానవ ప్రయోగాలు ప్రారంభం..

బుధవారం నుంచి జైకొవ్-డీ మానవ ప్రయోగాలు ప్రారంభించినట్లు జైడస్ కాడిలా సంస్థ ప్రకటించింది. దేశంలోని వివిధ ప్రాంతాల నుంచి వెయ్యి మందిని వ్యాక్సిన్​ ట్రయల్స్​ కోసం ఎంపిక చేయనున్నట్లు పేర్కొంది.

ఇదీ చదవండి-'కొవాగ్జిన్'​ మానవ ట్రయల్స్ షురూ..​