22 ఏళ్లకే ఐపీఎస్​.. గుజరాత్​ యువకుడి ఘనత

గుజరాత్​కు చెందిన హసన్ సఫిన్‌ అనే యువకుడు త్వరలో రికార్డు సృష్టించబోతున్నారు. దేశంలోనే అతి పిన్న వయస్సు ఐపీఎస్​ అధికారిగా మరికొన్ని రోజుల్లో బాధ్యతలు స్వీకరించనున్నారు సఫిన్​. 22 ఏళ్లకే ఈ ఘనత సాధించి ఎందరికో ఆదర్శంగా నిలుస్తున్నారు ఈ యువకుడు.

దేశంలోనే అత్యంత యువ ఐపీఎస్‌ అధికారిగా ఓ యువకుడు రికార్డు సృష్టించబోతున్నారు. గుజరాత్‌కు చెందిన ఆ యువకుడు 22ఏళ్లకే ఐపీఎస్‌ అధికారిగా బాధ్యతలు చేపట్టనున్నారు. గుజరాత్‌లోని పాలంపూర్‌ పట్టణం కనోదర్‌ గ్రామానికి చెందిన హసన్ సఫిన్‌.. గతేడాది యూపీఎస్సీ పరీక్షల్లో ఆల్‌ఇండియా స్థాయిలో 570 ర్యాంకు సాధించారు.

అనంతరం అతడు ఐపీఎస్‌ అధికారి పోస్టుకు ఎంపికయ్యారు. ఈ క్రమంలో శిక్షణ పూర్తి చేసుకున్న హసన్‌ డిసెంబర్‌ 23న జామ్‌నగర్‌ అదనపు ఎస్పీగా బాధ్యతలు చేపట్టనున్నారు.

ఐఏఎస్​ కావాలనుకున్నా కానీ..

తనకు ఐఏఎస్‌ అధికారి కావాలని లక్ష్యం ఉండేదని.. కానీ అది కుదరకపోవడం వల్ల చివరకు ఐపీఎస్‌గా సేవలు చేసేందుకు నిర్ణయించుకున్నట్లు హసన్ సఫిన్‌ తెలిపారు. సఫిన్​ తల్లి తల్లిదండ్రులు ముస్తఫా హసన్‌, నసీంభాను ఇద్దరూ ఓ వజ్రాల కంపెనీకి సంబంధించిన చిన్న యూనిట్‌లో పనిచేస్తుంటారు.

తన విద్యాభ్యాసం కోసం వారు ఎంతో శ్రమించారని.. వారితో పాటు అతడి కల నెరవేరడానికి పలువురు వ్యాపారులు ఆర్థిక సాయం చేసినట్లు హసన్​ చెప్పారు.

ఇదీ చూడండి:స్వచ్ఛత కోసం పిచ్చోడి అవతారమెత్తిన 'అభిమన్యు'డు