ఏం ఐడియా గురూ.. రోగులకు 'రోబో' చికిత్స!

కరోనా వైరస్​పై పోరాటంలో వైద్యులు చూపిన తెగువ గురించి ప్రత్యేకంగా చెప్పనక్కర్లేదు. వైరస్​ సోకిన రోగిని కాపాడేందుకు తమ ప్రాణాలను కూడా లెక్కచేయలేదు. అందుకే అలాంటి వైద్యులను కాపాడేందుకు ఈ యువ శాస్త్రవేత్త ఓ రోబోను సృష్టించాడు. మరి ఆ రోబో ఏం చేస్తుంది? వైద్యులకు ఎలా సాయం చేస్తుంది. తెలుసుకోవాలంటే చదివేయండి మరి.

హిందూ ఈశ్వరుడికే మొక్కుతాడు, ముస్లిం అల్లానే కొలుస్తాడు, క్రిస్టియన్ జీసస్​నే నమ్ముతాడు. కానీ మతాలతో సంబంధం లేకుండా ప్రతి ఒక్కరూ చేతులెత్తి నమస్కరించే మరో దేవుడు వైద్యుడు. కరోనా సమయంలో ఇది మరోసారి రుజువైంది. కరోనా రోగులకు చికిత్స అందిస్తూ ఎంతోమంది వైద్యులు కొవిడ్​ బారిన పడ్డారు. కొంతమంది ప్రాణాలూ కోల్పోయారు. ఇలాంటి ఘటనలు చూసి చలించిపోయాడు మధ్యప్రదేశ్​కు చెందిన ఓ యువ శాస్త్రవేత్త. వైద్యుల ప్రాణాలు కాపడేందుకు ఓ రోబోను తయారు చేశాడు.

'డాక్టర్'​ రోబో..

కరోనా రోగులకు చికిత్స అందించేందుకు వైద్యులకు బదులుగా రోబోలను పంపితే ఎలా ఉంటుందని ఆలోచించాడు జబల్​పుర్​కు చెందిన శాస్త్రవేత్త అభినవ్​ ఠాకూర్​. ఆ ఆలోచన నుంచి వచ్చిన అద్భుతమే ఈ రోబో.

ప్రత్యేకతలు..

• ఈ రోబో చేతిలో ఓ ప్లేట్​ ఉంటుంది. ఇందులో రోగికి కావాల్సిన మందులు ఉంటాయి.
• ఈ రోబోకు ఓ తెర కూడా ఉంది. ఇందులో నుంచి రోగి.. వైద్యుడిని చూడవచ్చు.
• రోబోకు ఉన్న కెమోరా నుంచి రోగిని వైద్యుడు చూసేలా ఏర్పాటు చేశారు.
• తన చేతిలో ఉన్న థర్మల్​ స్కానింగ్​ గన్​తో రోగి ఉష్ణోగ్రతను రోబోనే పరీక్షిస్తుంది.
• ఈ రోబో వైఫై ద్వారా పని చేస్తోంది.

ప్రయోగాత్మకం..

ప్రస్తుతం అభినవ్​ ఈ రోబోను ఓ ప్రైవేట్​ ఆసుపత్రికి ఇచ్చాడు. అక్కడి వైద్యులు, ఆరోగ్య సిబ్పందికి ఇది ఎంతగానో సహాయపడుతోంది. ప్రస్తుతం ఇది ప్రయోగంలో ఉందని విజయవంతమైతే.. మరిన్ని రోబోలను తయారు చేస్తానని అభినవ్​ తెలిపాడు. అభినవ్​కు నూతన ఆవిష్కరణలు కొత్త కాదు. ఇంతకుముందు కూడా ఆయన రోగులకు మందులు ఇంటికి తీసుకెళ్లి ఇచ్చేందుకు డ్రోన్లను కనిపెట్టాడు.

• ఇదీ చూడండి:గ్రెటా 'నిరసనల కుట్ర'పై​ దిల్లీ పోలీసుల కేసు