సున్నీ వక్ఫ్ బోర్డుకు 5 ఎకరాల భూమిని ఉత్తర్ప్రదేశ్ ప్రభుత్వం కేటాయించటంపై అఖిల భారత ముస్లిం పర్సనల్ లా బోర్డు (ఏఐఎంపీఎల్బీ) స్పందించింది. సున్నీ వక్ఫ్ బోర్డు ఆ భూమిని స్వీకరిస్తే.. ఆ నిర్ణయం దేశంలోని ముస్లింలందరి అభిప్రాయం కాదని స్పష్టం చేసింది.
"దేశంలోని ముస్లిం సమాజానికి సున్నీ వక్ఫ్ బోర్డు ప్రతినిధి కాదు. ఆ భూమిని బోర్డు స్వీకరిస్తే.. అది అందరి ముస్లింల అంగీకారం కాదు. ఏఐఎంపీఎల్బీ, సంబంధిత వర్గాలు అయోధ్యలోని ఏ భూమిని స్వీకరించకూడదని నిర్ణయించాం. "
-మౌలానా యాసిన ఉస్మానీ, ఏఐఎంపీఎల్బీ సభ్యుడు
మరో ఆలయం నిర్మిస్తాం: షియా వక్ఫ్ బోర్డు
సున్నీ వక్ఫ్ బోర్డుకు కేటాయించిన భూమిని తమకు ఇస్తే మరో రామమందిరాన్ని నిర్మిస్తామని ఉత్తర్ప్రదేశ్ షియా వక్ఫ్ బోర్డు తెలిపింది.
"షియాకు చెందిన మిర్ బాఖీ.. మసీదును నిర్మించిన వ్యక్తి. కానీ పరిహారంగా భూమి మాత్రం సున్నీలకు వెళ్లింది. ఇది పూర్తిగా షియాల తప్పే. తమ గళం వినిపించి ఉండాల్సింది. మాకు ఆ భూమిని ఇస్తే అక్కడ మరో రామమందిరాన్ని నిర్మిస్తాం."
- వాసీం రిజ్వీ, యూపీ షియా వక్ఫ్ బోర్డు ఛైర్మన్
కేబినెట్ ఆమోదం
సున్నీ వక్ఫ్ బోర్డుకు ప్రత్యామ్నాయ భూమిని ఇచ్చే ప్రతిపాదనకు ఉత్తర్ప్రదేశ్ కేబినెట్ ఆమోదం తెలిపింది. అయోధ్యకు 18 కిలోమీటర్ల దూరంలో ఉన్న ధన్నీపుర్ అనే గ్రామంలో ఐదెకరాల భూమిని బోర్డుకు కేటాయించింది. ఈ ప్రతిపాదనకు ఉత్తర్ప్రదేశ్ సీఎం యోగి ఆదిత్యనాథ్ నేతృత్వంలోని రాష్ట్ర కేబినెట్ ఆమోదం తెలిపింది.
మొదట కేంద్రానికి 3 ప్రాంతాలను ఎంపిక చేసి పంపింది యూపీ ప్రభుత్వం. వీటిని పరిశీలించి అయోధ్య నుంచి 18 కిలోమీటర్ల దూరంలో ఉన్న ధన్నీపుర్లోని భూమికి.. కేంద్రం ఆమోదం తెలిపింది. రవాణా వ్యవస్థతో పాటు భద్రత పరంగా అనువైన ప్రదేశం కావటం వల్ల కేంద్రం ధన్నీపుర్ వైపు మొగ్గు చూపింది కేంద్రం.
