'వ్యాపారులకేనా... మధ్య తరగతి ప్రజలకు లేదా?'

కేంద్రంపై కాంగ్రెస్ నేత రాహుల్ గాంధీ మరోసారి విరుచుకుపడ్డారు. పెద్ద వ్యాపారాలకు పన్ను ప్రయోజనాలు కల్పిస్తున్న ప్రభుత్వం.. మధ్యతరగతి ప్రజలకు రుణాలపై వడ్డీని మినహాయించడం లేదని విమర్శించారు. ప్రభుత్వాన్ని సూటు బూటు సర్కారుగా అభివర్ణించారు.

మోదీ సర్కార్​పై కాంగ్రెస్​ నేత రాహుల్ గాంధీ విమర్శల పర్వం కొనసాగుతోంది. రోజూ ఏదో ఒక అంశంలో ప్రభుత్వంపై విరుచుకుపడుతున్నారు రాహుల్. కరోనా వైరస్​ నుంచి ఆర్థిక వ్యవస్థ వరకు ప్రతి విషయంలో సర్కారు విఫలమైందంటూ ధ్వజమెత్తుతున్నారు.

తాజాగా మధ్యతరగతి ప్రజలకు రుణాలపై వడ్డీని మాఫీ చేయాలని డిమాండ్ చేశారు రాహుల్. పెద్ద పెద్ద వ్యాపారులకే పన్నులు ఎందుకు మాఫీ చేస్తున్నారని ప్రశ్నించారు. మోదీ ప్రభుత్వం 'సూటు బూటు సర్కార్' అంటూ ఎద్దేవా చేశారు.

"పెద్ద వ్యాపారాలకు రూ.1.45 లక్షల కోట్ల పన్ను ప్రయోజనాలు కల్పించారు. కానీ మధ్యతరగతి ప్రజలకు రుణాలపై వడ్డీపై మినహాయింపు మాత్రం లేదు. ఎందుకంటే ఇది సూటు బూటు సర్కార్."

-రాహుల్ గాంధీ, కాంగ్రెస్ నేత

మారటోరియం సమయంలో రుణాలపై వడ్డీ మాఫీకి సంబంధించి కేంద్రాన్ని సుప్రీంకోర్టు ప్రశ్నించిన వార్తా కథనాలను ట్వీట్​కు జతచేశారు రాహుల్.

కేంద్ర ప్రభుత్వం రిజర్వు బ్యాంకు వెనక దాక్కుంటోందని సుప్రీంకోర్టు బుధవారం వ్యాఖ్యానించింది. రుణాలు, ఈఎంఐలపై మారటోరియం సమయంలో వడ్డీ మాఫీపై స్పష్టమైన వైఖరి చెప్పాలని ప్రభుత్వాన్ని ఆదేశించింది. ఇందుకు వారం రోజుల గడువు ఇచ్చింది.

ఇదీ చదవండి-కరోనా వ్యాక్సిన్‌పై ముందుచూపు లేదు: రాహుల్‌