'రాజీవ్​ గాంధీ ట్రస్టుకు మెహుల్​ చోక్సి విరాళం'

రాజీవ్​ గాంధీ ఫౌండేషన్​ విరాళాలకు సంబంధించి కాంగ్రెస్​పై ఆరోపణలు తీవ్రతరం చేసింది భాజపా. ఆర్థిక నేరాలకు పాల్పడి దేశం వీడిన మెహుల్ చోక్సీ కూడా ట్రస్టుకు విరాళం ఇచ్చాడని.. ఆ తర్వాత బ్యాంకుల నుంచి రుణాలు పొందాడని భాజపా అధ్యక్షుడు జేపీ నడ్డా ఆరోపించారు.

భాజపా అధ్యక్షుడు జేపీ నడ్డా కాంగ్రెస్​పై మరోమారు తీవ్ర ఆరోపణలతో విరుచుకుపడ్డారు. రాజీవ్​ గాంధీ ఫౌండేషన్​ విరాళాలకు సంబంధించి విమర్శలకు మరింత పదును పెంచారు. ఆర్థిక నేరాలకు పాల్పడి దేశం వీడి పారిపోయిన మెహుల్​ చోక్సీ నుంచి రాజీవ్​ గాంధీ ట్రస్టుకు భారీగా విరాళాలు అందాయని ఆరోపించారు. అందుకు సాయంగా ఆ తర్వాత బ్యాంకుల నుంచి రుణాలను చోక్సీ పొందారని తెలిపారు.

" చైనా రాయబారుల నుంచి రాజీవ్ గాంధీ ట్రస్టుకు 2005 నుంచి 2009వరకు విరాళాలు అందాయి. వాణిజ్య ప్రయోజనాల కోసం పలు సంస్థలు, ఎన్జీవోలు భారీగా విరాళాలు సమకూర్చాయి. కాగ్ ఆడిటింగ్​ను ట్రస్టు ఎందుకు తిరస్కరించింది? సమాచార హక్కు చట్టం పరిధిలోకి రాజీవ్​ గాంధీ పౌండేషన్​ ఎందుకు రాదు? మెహుల్​ చోక్సీ నుంచి విరాళాలు ఎందుకు తీసుకున్నారు? అతనికి బ్యాంకు రుణాలు ఎందుకు ఇచ్చారు? ట్రస్టుకు చోక్సీకి సంబంధమేంటి? దేశ ప్రజలు ఈ విషయాలు తెలుసుకోవాలనుకుంటున్నారు."

- జేపీ నడ్డా, భాజపా అధ్యక్షుడు.

విదేశీ శక్తుల నుంచి విరాళాలు అందుకోవడం అంటే జాతీయ ప్రయోజనాలను పణంగా పెట్టినట్లేనని వ్యాఖ్యానించారు నడ్డా. రాజీవ్ గాంధీ ట్రస్టుకు, చైనా ప్రభుత్వానికి మధ్య ఏం జరిగిందో కాంగ్రెస్ చెప్పాలని డిమాండ్​ చేశారు.

సరిహద్దులో ఉద్రిక్త పరిస్థితుల నుంచి ప్రజల దృష్టిని మరల్చేందుకు చైనా నుంచి విరాళాల అంశాన్ని భాజపా తెరపైకి తెస్తోందని కాంగ్రెస్​ విమర్శిస్తోంది.