చైనాపై 'కరోనా' దర్యాప్తునకు డబ్ల్యూహెచ్​ఓ చర్యలు

కరోనా మూలాలపై పరిశోధనకు ఎంపిక చేసిన నిపుణుల జాబితాను చైనాకు అందించినట్లు ప్రపంచ ఆరోగ్య సంస్థ వెల్లడించింది. జాబితాపై చైనా ఆమోదం కోసం ఎదురుచూస్తున్నామని, ఆ తర్వాత తదుపరి చర్యలు ప్రారంభిస్తామని తెలిపింది.

కరోనా వైరస్ మూలాల్ని నిగ్గుతేల్చేందుకు చైనాకు పంపాల్సిన అంతర్జాతీయ దర్యాప్తు బృందంలోని నిపుణల జాబితాను బీజింగ్​కు అందజేసినట్లు ప్రపంచ ఆరోగ్య సంస్థ వెల్లడించింది. ఈ విషయంలో చైనా ఆమోదం కోసం ఎదురుచూస్తున్నట్లు గురువారం వెల్లడించింది డబ్ల్యూహెచ్​ఓ.

కరోనా మూలాలపై దర్యాప్తు చేయాలని ఈ ఏడాది మే నెలలో.. డబ్ల్యూహెచ్​ఓ చేసిన తీర్మానికి ఏకగ్రీవంగా ఆమోదం లభించింది. భారత్​ నేతృత్వంలో జరిగిన ఈ తీర్మానానికి చైనా కూడా మద్దతు ఇచ్చింది. ఈ మేరకు ఆగస్టులో చైనాను సందర్శించిన ఇద్దరు సభ్యుల బృందం.. జంతువులు, జలాశయాలపై దర్యాప్తు చేసేందుకు కావాల్సిన క్షేత్రస్థాయి ఏర్పాట్లను పూర్తి చేసింది.

ఈ మిషన్​ కోసం ప్రపంచవ్యాప్తంగా నిపుణులను ఎంపిక చేసినట్లు డబ్ల్యూహెచ్​ఓ అత్యవసర విభాగం చీఫ్​ మైక్ రియాన్​ తెలిపారు. చైనా నుంచి ఆమోదం లభించిన వెంటనే తదుపరి చర్యలు ప్రారంభిస్తామని స్పష్టం చేశారు.

కరోనా వ్యాప్తికి చైనానే కారణమంటూ అమెరికా, ఆస్ట్రేలియా సహా పలు దేశాలు మొదటి నుంచి విమర్శిస్తున్నాయి. ఈ విషయంలో దర్యాప్తు చేపట్టాలని డిమాండ్ చేస్తున్నాయి.