రోడ్డుపై 'వెండి వర్షం'.. ఎగబడ్డ జనం

చిన్నా, పెద్దా, ముసలీ, ముతకా తేడా లేకుండా.. ఆ ప్రాంతంలోని స్థానికులందరూ ఒక్కసారిగా రహదారిపైకి చేరారు. పోటాపోటీగా వెండి పూసలు, గోళీలు ఏరుకుంటూ బిజీగా గడిపారు. అదేంటీ రోడ్డుపై వెండి ఎక్కడిది అనుకుంటున్నారా..? అవును అక్కడ వెండి వర్షం కురిసింది మరి. బిహార్​ సీతామఢీలోని సుర్సంద్​లో జరిగిందీ ఘటన.

ఒక్కసారి ఆలోచించండి.. వేకువజామున మీరు మంచి నిద్ర నుంచి అప్పుడే లేస్తుండగా బంగారం, వెండి వర్షం కురిస్తే ఎలా ఉంటుంది. వినడానికి కాస్త వింతగా ఉన్నా.. ఇండో-నేపాల్​ సరిహద్దు ప్రాంతం బిహార్​లోని సుర్సంద్​ వద్ద అచ్చం ఇలాంటి ఘటనే జరిగింది.

ఉదయం కళ్లు తెరిచి చూసే సరికి రోడ్డుపై మొత్తం వెండి పరుచుకొని ఉంది. ఆశ్చర్యపోయిన స్థానికులు వెండి పూసలు, గోళీలను ఏరుకోవడం మొదలుపెట్టారు. అందినకాడికి దండుకొని పోయారు.

బాబా భీం రావ్​ అంబేద్కర్​ టవర్​ చౌక్​ నుంచి సుర్సంద్​లోని జవహర్​లాల్​ నెహ్రూ కళాశాల​ వరకు వెండి చెల్లాచెదురుగా పడి ఉంది. ప్రతి ఒక్కరూ వెండి ఎక్కడినుంచి వచ్చిందా అని ఆలోచనలో పడిపోయారు. కాస్త తేరుకున్న అనంతరం... ఇది మిడ్​నైట్​ స్మగ్లర్ల పనేనని భావించారు.

మిడ్​నైట్​ స్మగ్లర్ల పనే...

అర్ధరాత్రి పూట నేపాల్​ నుంచి సుర్సంద్​ మీదుగా భారత భూభాగంలోకి అక్రమంగా బంగారం, వెండి తరలిస్తుంటారు స్మగ్లర్లు. నేపాల్​ కరెన్సీతో వెండిని అక్కడి నుంచి సేకరించి.. భారత్​లోని టోకు వ్యాపారులకు విక్రయిస్తుంటారు. ఈ సారీ అలాగే తీసుకొస్తుండగా అదుపుతప్పి వెండి రోడ్డుపై పడిపోయి ఉంటుందని అనుమానిస్తున్నారు.

ఆలస్యంగా సమాచారం అందిన తర్వాత పోలీసులు ఘటనా స్థలానికి చేరుకొని దర్యాప్తు ప్రారంభించారు. కరెన్సీ మార్పు తదితర లావాదేవీలు ఎక్కువగా సుర్సంద్​ పంచాయతీ పరిసర ప్రాంతాల్లోనే జరుగుతుంటాయని వెల్లడించారు. ఆ కోణంలోనే విచారణ చేస్తున్నారు.

ఇదీ చూడండి:'దివాలా చట్టం' బలోపేతం చేస్తే బహులాభం