'నిందితులు పారిపోతుంటే పోలీసులు ఏం చేస్తారు మరి!'

'దిశ' కేసు నిందితుల ఎన్​కౌంటర్​ తప్పని పరిస్థితుల్లో చేసిందేనని అభిప్రాయపడ్డారు దిల్లీ మహిళా కమిషన్ ఛైర్​పర్సన్​ స్వాతి మాలివాల్. నిందితులు పారిపోయేందుకు ప్రయత్నిస్తే.. పోలీసులు మాత్రం ఏం చేస్తారని ప్రశ్నించారు. 'దిశ' హత్యాచారం తరహా ఘటనలపై శాశ్వత, కఠిన చర్యలు తీసుకునేవరకు తన పోరాటానికి మద్దతివ్వాలని కోరారు స్వాతి.

ఆడపిల్లలపై అత్యాచారానికి తెగబడేవారిని ఆరు నెలలలోపు ఉరితీసేలా కఠిన చట్టాలు తీసుకురావాలని ఉద్యమిస్తున్న దిల్లీ మహిళా కమిషన్ ఛైర్​పర్సన్​ స్వాతి మాలివాల్.. 'దిశ' కేసు నిందితుల ఎన్​కౌంటర్​పై స్పందించారు. పశువైద్యురాలిని నవంబర్ 27న అతికిరాతకంగా హత్యాచారం చేసిన దోషులు పారిపోతుంటే.. పోలీసులు మాత్రం ఏం చేయగలరని అన్నారు.

''హత్యాచారానికి పాల్పడ్డ నిందితులు తప్పించుకునేందుకు ప్రయత్నిస్తే పోలీసులు మాత్రం ఏం చేస్తారు? అందుకే దేశంలో బలమైన వ్యవస్థను తీసుకురావాలని మేము కేంద్రాన్ని కోరుతున్నాం. కోర్టు విచారణల తరువాత ఇలాంటి ఘోరాలకు పాల్పడే కామాంధులకు మరణ శిక్ష విధించాల్సిన అవసరం ఉంది. ఎన్​కౌంటర్​ చేయడం వల్ల కనీసం ఈ నలుగురినైనా.. నిర్భయ నిందితులను ప్రజల సొమ్ముతో జైల్లో పోషించినట్లు పోషించే పని లేకుండా పోయింది."
-స్వాతి మాలివార్​, డీసీడబ్ల్యూ చైర్​పర్సన్​

అత్యాచార దోషులకు 6 నెలల్లో మరణశిక్ష అమలు చేసేలా చట్టం చేయాలని డిమాండ్ చేస్తూ దిల్లీలో బుధవారం నుంచి ఆమరణ నిరాహార దీక్ష చేస్తున్నారు స్వాతి. శాశ్వత పరిష్కారం వచ్చే వరకు తన పోరాటం కొనసాగుతుందని స్పష్టంచేశారు.

ఇదీ చదవండి:'దిశ' నిందితుల హతంపై 'నిర్భయ' తల్లి హర్షం