బిహార్ పట్నా జిల్లాలో 15 రోజుల క్రితం జరిగిన ఓ పెళ్లి.. కరోనాకు కేంద్ర బిందువుగా మారింది. పెళ్లైన రెండు రోజులకే తీవ్ర జ్వరంతో పెళ్లికొడుకు మరణించగా.. అతనికి కరోనా నిర్ధరణ పరీక్ష చేయకుండానే అంత్యక్రియలు నిర్వహించారు.
అయితే ఈ వేడుక బిహార్లో అతిపెద్ద వైరస్ గొలుసుగా మారిందని ఆరోగ్య శాఖ అధికారులు వెల్లడించారు. జిల్లాలోని పాలీగంజ్లో సుమారు 100 మందికిపైగా కరోనా పాజిటివ్ వచ్చిందని తెలిపారు. కాంటాక్ట్ ట్రేసింగ్ ద్వారా దాదాపు 350 మందిని పరీక్షించామన్నారు.
లక్షణాలు కనిపించినా..
పెళ్లికొడుకు గురుగ్రామ్లో సాఫ్ట్వేర్ ఇంజినీర్గా పనిచేసేవాడు. మే చివరి వారంలో పెళ్లి కోసం స్వగ్రామానికి చేరుకున్నాడు. 'తిలక్' అనే వేడుక తర్వాత అతనిలో కరోనా లక్షణాలు కనిపించాయి. అతనికి తీవ్రంగా జ్వరం ఉన్నా పారాసెటిమాల్ వేసుకుని జూన్ 15న వివాహ తంతు జరిపించారు.
అతని ఆరోగ్య పరిస్థితి విషమించటం వల్ల జూన్ 17న పట్నా ఎయిమ్స్కు తరలించగా మార్గం మధ్యలోనే ప్రాణాలు కోల్పోయాడు. ఈ సమయంలో అతనికి ఎలాంటి నిర్ధరణ పరీక్షలు చేయకుండానే అంత్యక్రియలు నిర్వహించారు. ఈ విషయం అధికారులకు తెలియటంతో అతని సమీప బంధువులకు కరోనా పరీక్షలు చేయగా 15 మందికి పాజిటివ్గా తేలింది.
మరో 86 మందికి..
ఈ నేపథ్యంలో గ్రామంలో ప్రత్యేక క్యాంప్ ఏర్పాటు చేసి విస్తృతంగా పరీక్షలు నిర్వహించారు. మొత్తం 364 మందిని పరీక్షించగా 86 మందికి కరోనా పాజిటివ్ వచ్చింది. వీరిలో చాలామందికి ఎలాంటి లక్షణాలు లేకపోవటం గమనార్హం. ఆ 15 మంది నుంచే వీరికి సోకినట్లు భావిస్తున్నారు. అందరినీ ఐసోలేషన్ కేంద్రాలకు తరలించారు.
వివాహ వేడుకల్లో 50 మందికి మించి పాల్గొనకూడదన్న కేంద్ర ప్రభుత్వ మార్గదర్శకాలకు.. వీరు తిలోదకాలు ఇచ్చారు. ఈ వేడుకలో ఎక్కువ సంఖ్యలో అతిథులు పాల్గొన్నట్లు తెలుస్తోంది. ఈ పరిణామంతో స్థానిక ప్రజల్లో భయాందోళనలు మొదలయ్యాయి. పాలీగంజ్ బజార్ను సీజ్ చేసిన అధికారులు క్రిమిసంహారక మందులతో శుద్ధి చేశారు.
