'పోస్ట్మ్యాన్ సైకిల్ ఊర్లోకి వచ్చిందంటే చాలు ఊరంతా సందడి షురూ. ఎవరింటికి ఉత్తరమొచ్చిందా అనే ఆత్రుత. ఒకవేళ ఉత్తరం మనింటి గేటుకు తగిలించిన పోస్ట్ డబ్బాలోనే పడితే ఇక పండగే. దూరదూరాల్లో ఉండే ఆత్మీయులు ఏ కబురు పంపారో తెలుసుకునేందుకు మనసు, కళ్ల లోతుల్లో తహతహ. అబ్బో ఆ అనుభూతులన్నీ ఇప్పటి యువకులు అర్థం చేసుకోవాలంటే ఓ తరం వెనక్కి వెళ్లాల్సిందే' అంటూ ఉత్తరంతో ఉండే అనుబంధాన్ని ఈ తరానికి పరిచయం చేసే ప్రయత్నం చేస్తున్నారు ఉత్తరాఖండ్కు చెందిన సుందరమణి మండోలీ. కుమారుడి పెళ్లికి అతిథులకు శుభలేఖలు 1500 ఉత్తరాల రూపంలో పంపించి కొత్త ట్రెండ్ సృష్టిస్తున్నారు.
ఉత్తరం ఉనికి కోసం...
ఈ సెల్ఫోన్లు, ఇంటర్నెట్ రాకముందు ఉత్తరాలే ప్రధాన సమాచార మాధ్యమం. కానీ, పెరుగుతున్న టెక్నాలజీతో జాబుల కోసం ఎదురుచూసే మధురక్షణాలు కనుమరుగయ్యాయి. ఇలా ఉత్తరాలు ఉనికిని కోల్పోవడం చమోలీ జిల్లా ఫాలీ గ్రామానికి చెందిన సుందరమణికి ఏమాత్రం నచ్చలేదు. అందుకే తనయుడి వివాహ ఆహ్వాన పత్రికలను పోస్ట్ ద్వారా అతిథులకు పంపి.. తపాలా వ్యవస్థ తిరిగి జీవం పోసుకోవాలని ఆకాంక్షిస్తున్నారు.
"ఇలా ఉత్తరాలతో ఆహ్వానించాలని నా మనసులో ఎప్పటినుంచో ఉంది. ఈ కాలంలో ఉత్తరం దాని ఉనికిని కోల్పోయింది. అందుకే నేను దానికి తిరిగి జీవం పోయాలనుకున్నాను. నా కుమారుడి వివాహానికి ఉత్తరం ద్వారానే అతిథులకు సందేశం పంపాలనుకున్నా. 19వ శతాబ్దంలో ఈ ఉత్తరానికి గొప్ప మహత్యం ఉండేది. ప్రతి ఒక్కరి జీవితాల్లో ఇదో ఆశాకిరణంగా ఉండేది. ఉత్తరంతోనే సమాచారాలు తెలుకునేవారు. దీని కోసం దాదాపు ఆరు నెలల వరకు కూడా వేచి చూసేవారు. ఉత్తరం వచ్చిందంటే అన్నీ వచ్చేసినట్టే."
-సుందరమణి మండోలీ