'కాంగ్రెస్, ఐఎస్ఐల సంయుక్త వ్యూహం అదేనా?'

12ఏళ్ల క్రితం ముంబయిలో జరిగిన ఉగ్రదాడిని హిందూ ఉగ్రవాద ఘటనగా చూపే ప్రయత్నం జరిగిందని ఓ పుస్తకంలో ముంబయి మాజీ పోలీస్‌ కమిషనర్‌ రాకేశ్‌ మరియా​ వెల్లడించిన విషయంపై భాజపా స్పందించింది. హిందూ ఉగ్రవాదం అంశం.. కాంగ్రెస్, ఐఎస్ఐల సంయుక్త వ్యూహమా? అని ఆ పార్టీ అధికార ప్రతినిధి జీ వీ ఎల్​ నరసింహా రావు ప్రశ్నించారు.

ముంబయిలో 12ఏళ్ల క్రితం జరిగిన మారణహోమాన్ని హిందూ ఉగ్రవాద దాడిగా చూపేందుకు లష్కరేతోయిబా ఉగ్రవాద సంస్థ ప్రయత్నించినట్లు ముంబయి మాజీ పోలీస్​ కమిషనర్ రాకేశ్‌ మరియా.. 'లెట్​ మీ సే ఇట్​' నౌ పుస్తకంలో వెల్లడించారు. ఈ విషయంపై భాజపా తీవ్రంగా స్పందించింది. కాంగ్రెస్​ను లక్ష్యంగా చేసుకుని తీవ్ర విమర్శలు చేసింది. ఇస్లామిక్ ఉగ్రవాదం చరిత్రలో తొలిసారి ముష్కరులు తమ గుర్తింపును ప్రజలకు తప్పుగా చూపేందుకు ప్రయత్నించారని భాజపా అధికార ప్రతినిధి జీ వీ ఎల్​ నరసింహా రావు అన్నారు. హిందూ ఉగ్రవాద అంశం.. కాంగ్రెస్, పాకిస్థాన్ గూఢచర్య సంస్థ ఐఎస్​ఐల సంయుక్త ప్రాజెక్టా? అనే ప్రశ్నలు తలెత్తుతున్నట్లు అరోపించారు. ముంబయి దాడులు జరిగిన సమయంలోనే.. భారత స్వదేశీ సంస్థలు ఇస్లామిక్ తీవ్రవాద సంస్థలకంటే అత్యంత ప్రమాదకరం అని అమెరికా రాయబారులతో రాహుల్ గాంధీ​ చెప్పారని నరసింహా రావు ధ్వజమెత్తారు.

రాహుల్​ గాంధీ అప్పట్లో చేసిన వ్యాఖ్యలను గమనిస్తే నియంత్రణ రేఖ వెంబడి ఉన్న ఉగ్రవాద సంస్థలకు నిధుల చేరవేత, కసబ్​ తప్పుడు గుర్తింపు కార్డు వంటి విషయాల్లో భారీ కుట్ర దాగి ఉందనే అనుమానాలు తెలెత్తుతున్నాయని తీవ్ర ఆరోపణలు చేశారు నరసింహా రావు. కాంగ్రెస్​కు ఐఎస్​ఐతో సంబంధాలున్నాయా? అనే విషయంపై ఆ పార్టీ స్పష్టత ఇవ్వాలని డిమాండ్ చేశారు.

ముంబయి పేలుళ్ల తర్వాత కసబ్‌ ఫొటో ఒకటి బయటకొచ్చింది. అందులో భుజాన బ్యాగ్‌ వేసుకుని తుపాకీ పట్టుకుని వెళ్తున్న కసబ్‌ తన కుడిచేతికి ఎర్రదారం కట్టుకుని కన్పిస్తాడు. ఈ ఫొటో ద్వారా ముంబయి పేలుళ్లను 'హిందూ ఉగ్రవాదం' వల్ల జరిగిన ఘటనగా చూపించే ప్రయత్నం చేసింది లష్కరే తోయిబా సంస్థ. అంతేగాక కసబ్‌ గుర్తింపు కార్డులోనూ అతడి పేరు సమీర్‌ దినేశ్‌ చౌధరీ అని, బెంగళూరు వాసి అని ఉంది. దాడి చేసింది హిందువులే అన్నట్లు చూపించే ప్రయత్నం జరిగినట్లు తన పుస్తకంలో వెల్లడించారు రాకేశ్‌ మరియా.