దిల్లీ సరిహద్దుల్లో వేలాది మంది రైతుల ఆందోళనలకు కారణమైన వ్యవసాయ చట్టాలపై అధికార, విపక్షాల మధ్య మాటల యుద్ధం తీవ్రమైంది. కొత్త చట్టాలను తక్షణమే రద్దు చేయాలని విపక్షాలు డిమాండ్ చేస్తుండగా.. ఆయా పార్టీలపై భాజపా ఎదురుదాడికి దిగింది.
'అవి 'అంబానీ-అదానీ' చట్టాలు'
కొత్త వ్యవసాయ చట్టాల్ని 'అంబానీ-అదానీ చట్టాలు'గా అభివర్ణించారు కాంగ్రెస్ అగ్రనేత రాహుల్‌ గాంధీ. వాటిని వెంటనే రద్దు చేయాలని డిమాండ్ చేశారు. అంతకు మించి ప్రభుత్వం ఎలాంటి ప్రతిపాదనను ముందుకు తెచ్చినా అంగీకరించేది లేదని స్పష్టం చేశారు.
'రద్దు చేయండి.. లేదా గద్దె దిగండి'
కొత్త వ్యవసాయ చట్టాలు ప్రజావ్యతిరేకమని విమర్శించారు బంగాల్ ముఖ్యమంత్రి, టీఎంసీ అధినేత్రి మమతా బెనర్జీ. తక్షణమే ప్రభుత్వం వాటిని ఉపసంహరించుకోవాలని, లేదా గద్దె దిగాలని డిమాండ్ చేశారు. రైతుల హక్కులను హరించిన భాజపా ప్రభుత్వానికి అధికారంలో ఉండే హక్కులేదన్నారు. ఈ వ్యవహారంపై తాను జైలుకు వెళ్లడానికైనా సిద్ధమని.. కానీ మౌనంగా మాత్రం ఉండనని స్పష్టం చేశారు మమత.
ఇదీ చూడండి:-రైతుల ఆందోళనలకు మద్దతు తెలిపిన దిల్లీ సీఎం