ఝార్ఖండ్​ 'రెండో విడత'లో 64.39 శాతం ఓటింగ్​​

ఝార్ఖండ్​ శాసనసభ ఎన్నికల రెండో విడత పోలింగ్​ ముగిసింది. నక్సల్స్​ ప్రభావిత ప్రాంతాల్లో మధ్యాహ్నం 3 గంటలకే ముగియగా.. మిగతా పోలింగ్​ కేంద్రాల్లో 5 గంటల వరకు జరిగింది. 64.39 శాతం ఓటింగ్​ నమోదయింది. సిసాయ్ నియోజకవర్గంలో భద్రతాదళాలు జరిపిన కాల్పుల్లో ఓ వ్యక్తి చనిపోయాడు.

ఝార్ఖండ్ శాసనసభ ఎన్నికల రెండో విడత పోలింగ్ ముగిసింది. మొదట నక్సల్స్ ప్రభావిత ప్రాంతాల్లో ఉన్న 18 స్థానాల్లో పోలింగ్ మూడు గంటలకే ముగిసింది. మిగతా రెండు స్థానాలైన జంషెడ్​పుర్ తూర్పు, పశ్చిమలో సాయంత్రం 5 గంటల వరకు పోలింగ్ జరిగింది.

64.39 శాతం ఓటింగ్​ నమోదు..

రెండో విడతలో మొత్తం 20 అసెంబ్లీ స్థానాలకు నేడు ఎన్నికలు జరిగాయి. సాయంత్రం వరకు మొత్తం 64.39 శాతం ఓటింగ్​ నమోదైనట్లు ఎన్నికల సంఘం అధికార వర్గాలు పేర్కొన్నాయి.

సిసాయ్​లో కాల్పులు..

సిసాయ్ నియోజకవర్గంలో భద్రతాదళాలు జరిపిన కాల్పుల్లో గాయపడిన ఓ వ్యక్తి చనిపోయాడు. ఈ ఘటనలో మరో ఇద్దరు గాయపడ్డారు. సింగ్ భం జిల్లాలో ఎన్నికల విధులు నిర్వహిస్తున్న సబ్ ఇన్ స్పెక్టర్ ఒకరు గుండెపోటుతో చనిపోయారు. ఘటన జరిగిన పోలింగ్​ బూత్ నంబర్​ 36​లో ఎన్నికలు రద్దు చేశారు రాష్ట్ర ప్రధాన ఎన్నికల అధికారి వినయ్​ కుమార్​ చౌబే. దర్యాప్తు చేపడతామని వెల్లడించారు.

పశ్చిమ సింగ్​ భం​ జిల్లా చాయ్​బాసా నియోజకవర్గ పరిధిలోని జోజోహటు గ్రామంలో నక్సలైట్లు ఓ ఖాళీ బస్సుకు నిప్పు పెట్టారు. ఈ ఘటనలో ఎవరికీ ఏమీ కాలేదు.

బరిలో ముఖ్యమంత్రి..

ఝార్ఖండ్ సీఎం రఘుబర్ దాస్, స్పీకర్ దినేష్ ఓరాన్, భాజపా అధ్యక్షుడు లక్ష్మణ్ గిలువా తదితర ప్రముఖులు.. ఈ విడతలో తమ అదృష్టాన్ని పరీక్షించుకుంటున్నారు.

పటిష్ఠ భద్రత ఏర్పాటు..

నక్సల్స్‌ ప్రభావిత ప్రాంతాలు కావటంతో కేంద్ర బలగాలు సహా 42వేల మంది సాయుధ పోలీసులను మోహరించి పటిష్ట భద్రత ఏర్పాటు చేశారు. మొత్తం 6వేల 66 పోలింగ్‌ కేంద్రాలు ఉండగా వాటిలో 949 పోలింగ్‌ కేంద్రాలను సమస్యాత్మకంగా, 762 అత్యంత సమస్యాత్మక ప్రాంతాలను గుర్తించి.... ఆ మేరకు ఏర్పాట్లు చేసినట్లు చెప్పారు. భద్రతా కారణాలతో 101 పోలింగ్‌ కేంద్రాలను మార్చినట్లు చెప్పిన అధికారులు.... ఇక్కడి ఓటర్ల కోసం ఉచిత రవాణా సౌకర్యం ఏర్పాటు చేసినట్లు తెలిపారు.

12న మూడో విడత..

ఝార్ఖండ్‌లో తొలివిడత పోలింగ్‌ గతనెల 30న 13 స్థానాలకు జరగ్గా....12, 16, 20 తేదీల్లో మిగతా మూడు విడతల ఓటింగ్‌ జరగనుంది. ఈనెల 23న ఫలితాలు వెలువడనున్నాయి.

ఇదీ చూడండి: ఝార్ఖండ్​: పోలింగ్ కేంద్రం వద్ద కాల్పులు.. ఒకరి మృతి