హత్య కేసులో నిందితుడిని పట్టించిన మద్యం సీసా

మద్యం సీసా ఆధారంగా ఓ బార్​ ఉద్యోగిని హత్య కేసులో నిందితుడిని పట్టుకున్నారు ముంబయి పోలీసులు. మద్యం సీసాపై బ్యాచ్​ నంబర్​ సాయంతో అది కొన్న మద్యం దుకాణాన్ని గుర్తించారు. అక్కడి సీసీటీవీ దృశ్యాలను పరిశీలించి నిందితుడిని బంగాల్​లో అదుపులోకి తీసుకున్నారు పోలీసులు.

ముంబయిలో ఓ బార్​ ఉద్యోగిని హత్య కేసులో నిందితుడిని ఎంతో చాకచక్యంగా పట్టుకున్నారు మహారాష్ట్రలోని దహిసర్​ పోలీసులు. డిసెంబర్​ 29న ముంబయిలోని ఓ అద్దె ఇంటిలో రోజినా షేక్​ మృతదేహాన్ని గుర్తించారు పోలీసులు. అదే గదిలో ఉన్న మద్యం సీసా, రెండు గ్లాసుల ఆధారంగా నిందితుడు స్వపన్ పరేశ్ రాయ్​దాస్​ను బంగాల్​లో పట్టుకున్నారు.

మద్యం సీసాపై ఉన్న బ్యాచ్​ నంబర్ ఆధారం చేసుకుని విచారణ చేపట్టారు పోలీసులు. ఈ మద్యాన్ని సరఫరా చేసిన దుకాణంలోని సీసీటీవీ కెమెరాల పరిశీలించి రాయ్​దాస్​ను బంగాల్​లోని హావ్​డాలో పట్టుకున్నారు.

దొంగతనం కోసం అనుకుంటే..?

గదిలో మొబైల్​, డబ్బు, బంగారం చోరీ కావటం వల్ల మొదట దొంగతనం కోసం ఈ హత్య జరిగిందని పోలీసులు భావించారు. అయితే నిందితుడి వాంగ్మూలం ప్రకారం ఇద్దరు కొంతకాలంగా సహజీవనం చేస్తున్నట్లు తెలిసింది. తన భార్యకు ఈ విషయం గురించి చెబుతానని రోజినా హెచ్చరించిన నేపథ్యంలో రాయ్​దాస్​ హత్య చేశాడని పోలీసులు తెలిపారు.