ఉరిని తప్పించుకునేందుకు నిర్భయ దోషి 'క్యురేటివ్​' అస్త్రం

నిర్భయ దోషుల్లో ఒకడైన వినయ్ కుమార్ శర్మ సుప్రీం కోర్టులో క్యురేటివ్ పిటిషన్​ దాఖలు చేశాడు. మరణ శిక్ష నుంచి ఊరట లభించేందుకు చివరి న్యాయపరమైన అవకాశాన్ని ప్రయోగించాడు.

మరణ శిక్ష తప్పించుకునేందుకు నిర్భయ దోషుల్లో ఒకడైన వినయ్​ కుమార్​ శర్మ శతవిధాల ప్రయత్నించాడు. చివరి న్యాయపరమైన అవకాశం క్యురేటివ్​ పిటిషన్​ అస్త్రాన్ని తాజాగా ప్రయోగించాడు. సుప్రీంలో వినయ్​ తరఫు న్యాయవాది ఈ రోజు క్యురేటివ్ పిటిషన్​ను దాఖలు చేశారు.

ఏంటీ క్యురేటివ్​ పిటిషన్​?

క్యురేటివ్​ పిటిషన్​ అనేది.. న్యాయపరంగా ఒక వ్యక్తికి అందుబాటులో ఉన్న చివరి సహాయం. ఈ పిటిషన్​.. అరుదైన, ప్రత్యేక కేసుల్లోనే అందుబాటులో ఉంటుంది. క్యురేటివ్​ పిటిషన్​పై విచారణ రహస్యంగా జరుగుతుంది.

ఇదీ జరిగింది...

2012 డిసెంబరు 16వ తేదీ రాత్రి 23 ఏళ్ల పారామెడికల్‌ విద్యార్థినిపై దిల్లీలో ఆరుగురు సామూహిక అత్యాచారానికి పాల్పడ్డారు. వీరిలో ఒకడు మైనర్​ కాగా.... మరొకడు తిహార్​ జైలులో ఆత్మహత్య చేసుకున్నాడు. మిగిలిన దోషులైన ముకేశ్​, పవన్​ గుప్తా, వినయ్​ శర్మల రివ్యూ పిటిషన్లను గతేడాది జులై 9నే కోర్టు కొట్టివేసింది. మరో దోషి అక్షయ్​ కుమార్ సింగ్​.. మరణశిక్షపై పునఃసమీక్షించాలంటూ తాజాగా సుప్రీంను ఆశ్రయించాడు. దీనినీ సర్వోన్నత న్యాయస్థానం కొట్టివేసింది.

ఈ నేపథ్యంలో దోషులకు డెత్​ వారెంట్​ జారీ చేస్తూ ఇటీవల దిల్లీ కోర్టు ఆదేశాలు ఇచ్చింది. ఈ నెల 22న వీరిని ఉరి తీయనున్నారు.