ఆ రాష్ట్ర గవర్నర్​కు కరోనా పాజిటివ్​

కొవిడ్​ బారిన పడే ప్రముఖుల జాబితా పెరుగుతోంది. తాజాగా.. ఉత్తరాఖండ్​ గవర్నర్ బేబీ రాణి మౌర్య​కు కరోనా పాజిటివ్​గా నిర్ధరణ అయింది. లక్షణాలు ఏమీ లేకపోయనా స్వీయ నిర్బంధంలో ఉన్నట్లు ఆమె తెలిపారు.

ఉత్తరాఖండ్​ గవర్నర్ బేబీ రాణి మౌర్య కొవిడ్​ బారిన పడ్డారు. ఆదివారం నిర్వహించిన పరీక్షలో ఆమెకు పాజిటివ్​గా తేలింది. ట్విట్టర్​ వేదికగా ఆమె ఈ విషయాన్ని తెలిపారు. తనను కలిసిన వారు పరీక్షలు చేయించుకోవాల్సిందిగా కోరారు.

"కరోనా పరీక్షలో నాకు పాజిటివ్​గా నిర్ధరణ అయింది. లక్షణాలు ఏమీ లేవు. వైద్యుల పర్యవేక్షణలో ఐసోలేషన్​లో ఉంటున్నాను. కొద్దిరోజులుగా నన్ను కలిసినవారు పరీక్షలు చేయించుకోవాల్సిందిగా కోరుతున్నాను."

-- బేబీ రాణి మౌర్య, ఉత్తరాఖండ్​ గవర్నర్

వారం రోజుల పాటు ఆగ్రా పర్యటనకు వెళ్లిన గవర్నర్ బేబీ రాణి మౌర్య.. ఉత్తరాఖండ్​కు శుక్రవారమే తిరిగి వచ్చారని ​రాజ్​ భవన్​ వెల్లడించింది. శని, ఆదివారం సెలవులు కాగా రాజ్​భవన్ కార్యాలయం మూసి ఉంది. అధికారులు, ఉద్యోగులను గవర్నర్ కలవనందున.. గవర్నర్​ సచివాలయ కార్యకలపాలు యథావిధిగా జరగనున్నాయి. ​

ఉత్తరాఖండ్​లో ఆదివారం కొత్తగా 466 మంది వైరస్​ బారిన పడ్డారు. మెత్తం కేసుల సంఖ్య 71,526కు చేరింది.

కరోనాతో ఒడిశా ప్రథమ మహిళ మృతి..

ఒడిశా గవర్నర్​ గణేశీ లాల్​ భార్య సుశీలా దేవి కరోనా బారిన పడి మృతి చెందారు. నవంబర్​ 1న గవర్నర్​ కటుంబ సభ్యులకు సోకగా భువనేశ్వర్​లోని ఓ ప్రైవేట్​ ఆసుపత్రిలో చికిత్స పొందుతున్నారు. ఆదివారం రాత్రి సుశీలా దేవి ఆరోగ్య పరిస్థితి విషమించగా కన్నుమూశారు. ​

ఒడిశా ప్రథమ మృతి పట్ల గవర్నర్​ కుటుంబ సభ్యులకు ఆ రాష్ట్ర ముఖ్యమంత్రి నవీన్​ పట్నాయక్​ సంతాపం తెలిపారు. భాజపా జాతీయ ఉపాధ్యక్షుడు జయ్​ పాండా ట్విట్టర్​ వేదికగా ప్రగాఢ సానుభూతి తెలిపారు.

ఒడిశాలో మరో 638 మందికి వైరస్​ సోకగా.. మెుత్తం బాధితుల సంఖ్య 3,13,961కు చేరింది. కొత్తగా 15 మంది మరణించగా.. మొత్తం మృతుల సంఖ్య 1640కి పెరిగింది.

ఇదీ చూడండి:దేశంలో 91 లక్షలు దాటిన కరోనా కేసులు